पोखरा । नेकपा एमाले गण्डकी प्रदेशको प्रथम अधिवेशन सोमबारदेखि पोखरामा सुरु हुँदैछ । अधिवेशनमा ११ जिल्लाबाट ९ सय ७ जना प्रतिनिधि चुनिएका छन् ।

प्रदेशका ११ जिल्लाबाट सहभागी हुने ती प्रतिनिधीले नयाँ नेतृत्व छनौट गर्ने प्रदेश अध्यक्ष नवराज शर्माले बताए । पार्टीले आइतबार पोखरामा सञ्चारकर्मीसंग भेटघाट कार्यक्रम आयोजना गरी प्रदेश अधिवेशनको सम्पूर्ण तयारी पूरा भएको र बन्द शत्रपछि हुने निर्वाचनले नयाँ नेतृत्व छनौट गर्ने जानकारी दिएको छ ।

अधिवेशनमा सबैभन्दा धेरै प्रतिनिधि कास्की जिल्लाबाट रहनेछन् । कास्कीबाट कुल १ सय ४६ जना प्रतिनिधि सहभागी बन्दा स्याङजाबाट १ सय १३, पर्वतबाट १ सय १०, नवलपुरबाट १ सय ९, मनाङबाट १४, मुस्ताङबाट १६, गोरखाबाट ५३, तनहुँबाट ८२, लमजुङबाट ६५, म्याग्दीबाट ४२, बागलुङबाट ७२ र जनसंगठनबाट ८६ प्रतिनिधिले सहभागीता जनाउने एमाले गण्डकी प्रदेश उपसचिव एवं प्रचार प्रसार उपसमिति संयोजक रश्मि आचार्यले जानकारी दिए ।

अधिवेशनको उद्घाटन सत्र झाँकीसहित भव्य बनाउने तयारी छ । पोखराको अम्मरसिंह चौरमा हुने उद्घाटन समारोहमा ५० हजार कार्यकर्ता तथा शुभचिन्तकको उपस्थिति हुने दाबी एमाले गण्डकीले गरेको छ । अधिवेशनको अध्यक्ष केपी शर्मा ओलीले उद्घाटन गर्नेछन् । सो कार्यक्रममा अध्यक्ष ओली, महासचिव शंकर पोखरेल, उपमहासचिव पृथ्वी सुब्बा लगायतका शिर्ष नेताले सम्बोधन गर्ने कार्यक्रम तय भएको अध्यक्ष  शर्माले वताए।

अधिवेशनको उद्घाटन समारोह अगाडि सहभागीहरु पोखराको हस्पिटलचोक, औद्योगिक क्षेत्र, बुद्धचोक र बसपार्कबाट बृहत झाँकिसहितको र्‍याली मार्फत अम्मरसिंह चौरतर्फ प्रस्थान गर्नेछन् ।

अधिवेशन मार्फत १ सय ६५ सदस्यीय प्रदेश कमिटी निर्वाचित हुनेछ । प्रदेश गण्डकीका अध्यक्ष शर्माले विद्युतिय भोटिङ मेसिन मार्फत निर्वाचन गरिने भएकोले रिजल्ट आउन समय नलाग्ने सञ्चारकर्मीसँग बताए ।

‘१५ गते उद्घाटन सत्र र साँझ बन्द सत्र सुरु हुने, १६ गते प्रतिवेदनमाथि छलफल र निर्वाचन प्रक्रिया आरम्भ गरिने र १७ गते मतदान गरेर सोहि दिन रिजल्ट सार्वजनिक गर्ने तयारी गरेका छौं’ शर्माले भने । अधिवेशनको लागि बाहिरी जिल्लाबाट पोखरामा आउने प्रतिनिधिको आवासको लागि २१ वटा होटल बुक गरिएको र प्रतिनिधिहरु तोकिएका स्थानहरुमा नै रहनुपर्ने गरी व्यवस्था  मिलाइएको छ ।

एमाले सचिव एवं प्रदेश इञ्चार्ज गोर्कण विष्टले सहमतिको अन्तिम प्रयास बाँकी नै रहेको बताए ।