कर्णाली प्रदेशको जाजरकोट जिल्ला केन्द्रबिन्दु भई कार्तिक १७ गते राती करिब ११ बजेर ४७ मिनेटमा गएको विनाशकारी भूकम्पबाट जाजरकोट, रुकुम पश्चिम लगायत वरपरका जिल्लाहरूमा समेत ठुलो जनधनको क्षति हुन पुगेको छ ।

सरकारी संयन्त्रमात्र नभई यो दु:खद घडीमा निजी क्षेत्रलेसमेत आफ्नो क्षेत्रबाट सक्दो सहयोग राहत घोषणा गरिरहेका छन् ।

पोखराको लेकसाइड स्थित होटल सदनले पनि सहयोग गर्ने भएको छ । आफ्नो होटलमा रहेको कोठा विक्रिबाट दुई दिनसम्म हरेक कोठाबाट २५० रुपैंयाका दरले हुन आउने रकम एकमुष्ठ रुपमा प्रदान गरिने होटल सदनका सञ्चालक विश्वदर्शन पराजुलीले जानकारी दिए ।

जाजरकोट तथा पश्चिम रुकुममा गएको भुकम्पबाट भएको मानवीय तथा सम्पूर्ण क्षतिप्रति दु:ख व्यक्त गर्दै उनले भने– ‘यस दु:खद परिस्थितिमा हातेमालो गर्ने सानो प्रयास स्वरुप हाम्रो होटलमा भएका सबै २० कोठामध्ये शनिबार र आइतबार दुई दिन विक्री हुने हरेक कोठाबाट प्रतिकोठा २५० का दरले प्रधानमन्त्री दैवी प्रकोप राहत कोषमा दाखिला हुने गरी जम्मा गर्नेछौँ ।

यसैबीच, गण्डकी प्रदेश सरकारले चिकित्सक र स्वास्थ्यकर्मीको टोली पठाएको छ । पोखरा महानगरपालिकाले ५० लाख सहयोग गर्ने भएको छ । मेयर, उपमेयर, वडाध्यक्ष सहित कार्यपालिका सदस्यहरुबाट एक महिनाको तलब सहयोग गर्ने भएका छन् भने राहत सामाग्री लिएर वडाध्यक्षसहितको टोली गएको छ ।