दलालमार्फत् लुकिछिपी बिना भिसा अमेरिका पुगेका नेपाली युवकको ज्यान गएको छ ।

सिन्धुपाल्चोकको बाह्रबिसे नगरपालिका ६ का स्थायी बासिन्दा ३४ वर्षका सुवास श्रेष्ठको ज्यान गएको हो । हिरासतमा बसेको बेला कात्तिक २७ गते उनको मृत्यु भएको हो । उनलाई  अवैधरुपमा प्रवेश गरेको भन्दै डिपोर्ट गर्ने तयारी थियो ।

उनी गत सेप्टेम्बर २ तारिखमा अमेरिका प्रवेश गरेको खसोखास डटकमको समाचारमा उल्लेख छ । दलाललाई मोटो रकम बुझाएर विना भिसा अमेरिका पुगेका उनी त्यहाँ छिर्नासाथ अमेरिकी प्रहरीको नियन्त्रणमा पुगेका थिए । त्यसपछि उनलाई अध्यागमन हिरासतमा राखियो ।

टेक्सासको कर्नेस काउन्टी इमिग्रेसन प्रोसेसिङ सेन्टरमा आइसको हिरासतमा रहेका श्रेष्ठको सोमबार मृत्यु भएको अमेरिकाको इमिग्रेशन एण्ड कस्टम इन्फोर्समेन्ट एजेन्सी आइसले पुष्टी गरेको समाचार छ । सन् १९८९ को जुन ४ मा जन्मिएका सुवासको मृत्युको कारण केही दिनमा सार्वजनिक हुने अपेक्षा गरिएको छ ।

श्रेष्ठ गत सेप्टेम्बर २ मा एरिजोनाको लुकभिल नजिकैबाट विना भिसा अमेरिका प्रवेश गरेका थिए । उनी अध्यागमन अधिकारीद्वारा निरीक्षण, भर्ना वा प्यारोल बिना नै अमेरिका प्रवेश गरेको आइसले जनाएको छ ।

पारिवारिक श्रोतका अनुसार ०८० भदौ ५ गते उनी घरबाट हिँडेका थिए । एजेन्टलाई ८५ लाख रुपैयाँ बुझाएर उनी काठमाडौंबाट टर्की, स्पेन हुँदै मेक्सिको पुगेका थिए ।

यूएस बोर्डर पेट्रोलले उनलाई अध्यागमन र राष्ट्रियता ऐनको सेक्सन २१२ अन्तर्गत शीघ्र देशनिकालाका लागि सूचना र आदेश दिएको थियो । सेप्टेम्बर ९ मा यूएस बोर्डर पेट्रोलले श्रेष्ठलाई इन्फोर्समेन्ट एन्ड रिमुभल अपरेसन सान एन्टोनियोमा स्थानान्तरण गरेको थियो । त्यसपछि उनलाई उनलाई कर्नेस काउन्टी इमिग्रेसन प्रोसेसिङ सेन्टरमा हिरासतमा राखिएको थियो, जहाँ उनको अध्यागमन मुद्दा जारी थियो ।

नोभेम्बर १३ मा इन्फोर्समेन्ट एन्ड रिमुभल अपरेसनलाई उनी अचेत भएकोबारे सूचित गरिएको थियो । मेडिकल सहायता पछि श्रेष्ठलाई मृत घोषणा गरिएको थियो ।

सिन्धुपाल्चोकका बाह्रबिसे नगरपालिकाका मेयर बालकृष्ण बस्नेतका अनुसार मृतक श्रेष्ठ बाह्रबिसे नगरपालिका–६ का वडाध्यक्षका छोरा हुन् । मृतक श्रेष्ठका श्रीमती र दुई सन्तान छन् । नगर प्रमुख बस्नेतले मृत्युको खबर पाए लगतै शव स्वदेश झिकाउने तयारी भइरहेको बताए ।