पोखरा ५, पर्स्याङ स्थित शान्ति निकेतन स्कुलका कक्षा १० का विद्यार्थीलाई बिदाई गरिएको छ ।

यहि चैत २३ गते समापन भएको एसईईमा सहभागी भएका विद्यालयका १४ औं ब्याचका विद्यार्थीहरुलाई मायाको चिनो प्रदान गरी उत्कृष्ट नतिजाको शुभकामनासहित विद्यालयले एक कार्यक्रमका बीच बिदाई गरेको हो ।

बिदाई कार्यक्रममा विद्यालयका संस्थापक प्राचार्य डा. महेश्वर पराजुलीले यस वर्षको एसईईमा सहभागी भएका सबै ४० जना विद्यार्थीलाई सफलताको शुभकामना प्रकट गरे ।

‘सबै विद्यार्थीहरुले परीक्षामा राम्रो गरेकोमा म विश्वस्त छु । तपाईंहरुले उत्कृष्ट अंक ल्याई शान्ति निकेतनको नाम चम्काउनुहुनेछ, इतिहास रच्नुहुनेछ ।’ डा. पराजुलीले भने – ‘उच्च शिक्षाको लागि तयार भएका विद्यार्थीको उज्वल भविष्यको कामना गर्दछु । यो वास्तवमा बिदाई होइन, आगामी दिनको लागि शुभयात्रा हो ।’

बिदाई कार्यक्रममा बोल्दै शिक्षासेवी किरण सापकोटाले विद्यालयको शैक्षिकसँगै अतिरिक्त क्रियाकलापमा उत्कृस्ट बिद्यार्थी उत्पादन गर्न सफल भएकोमा मुक्त कण्ठले प्रशंसा गरे ।

विद्यालयका सह–प्राचार्य यदुविलास भुर्त्याल, कक्षा १० का कक्षा शिक्षक हेम सुवेदी, अभिभावकको तर्फबाट सुरेन्द्र यादब र माविमा अध्यापनरत सम्पूर्ण शिक्षकहरुले परीक्षामा सहभागी भएका सबै विद्यार्थीले राम्रो गर्नेमा आफुहरु विश्वस्त रहेको भन्दै अग्रिम बधाई प्रकट गरे ।

कार्यक्रममा एसईईमा सहभागी भएका मध्येबाट विद्यार्थी शैलज अधिकारीले आफ्नो अनुभव सुनाए र विद्यालयलाई धन्यवाद पनि दिए ।