पोखरा वडा नं. २४, कास्कीकोटमा एक महिने ध्यान शिविर साधना कार्यक्रम जारी छ ।

गत फागुन २० गतेदेखि कास्कीकोटको धार्मिक एवं पर्यटकिय महत्व अभिवृद्घि गर्ने उद्देश्यका साथ विश्वशान्ति ध्यान केन्द्र शंखु धुलिखेल र पेमाझाङ स्पिरिचुअल स्कुल काभ्रेको संयुक्त आयोजनामा साधना कार्यक्रम भइरहेको छ ।

कश्यप तपोभूमी थामाकोगरामा ध्यानगुरूद्वय परमहंस स्वामी कल्याणमित्र र पेमाझाङद्वारा साधना भइरहेको हो ।

यसैबीच ध्यान शिविर तथा साधनामा रहेका गुरुहरु परमहंस स्वामी कल्याणमित्र र पेमाझाङलाई हाम्रो कास्कीकोट युवा संजालले बुधवार एक कार्यक्रम गरी सम्मान अर्पण गरेको छ । उक्त अवसरमा ध्यान गुरुहरुबाट उपस्थित सबैले रुद्राभिषेक तथा आशिर्वचन ग्रहण गरेका थिए ।
तपस्वी गुरु परमहंस स्वामी कल्याणमित्रले कश्यप तपोभूमि नेपालकै सुन्दर र शान्त ठाउँमा रहेको हुनाले ध्यान गरी ज्ञान प्राप्त गर्न सकिने तथा सो ठाउँको प्रवर्द्धन गर्न आफू सधै आउने वाचा गरे ।

साथै, अर्का तपस्वी पेमाझाङले यो ठाउँको शक्तिले गर्दा आफु १३ दिनदेखि निराहार तपस्या गरेको’ कुरा सुनाए ।

कार्यक्रमका प्रमुख आमन्त्रित व्यक्तित्व वडा नम्बर २४ का अध्यक्ष भरत बहादुर अधिकारीले कास्कीकोटको ऐतिहासिक पृष्ठभूमिलाई बर्तमानमा चरितार्थ पारी कश्यप तपोभुमिलाई प्रवर्द्धन गर्न महत्वपूर्ण योगदान तपस्वी गुरुहरुले दिएकोमा धन्यवाद ज्ञापन गरे ।

पूर्व वडा अध्यक्ष ओम सुवेदीले संजालका गतिविधिको मुक्तकण्ठले प्रशंसा गर्दै कश्यप तपोभूमि सँगै छिट्टै बन्न लागेको नेपाल वृन्दावन धामले कास्कीकोटको मुहार फेर्ने कुरामा जोड दिए ।

कार्यक्रममा सञ्जालका सल्लाहकार रामप्रसाद शर्मा, पूर्व संयोजक हेम सुवेदी, गुप्तकालिका धार्मिक क्षेत्र विकास समितिका सचिव ठाकुर प्रसाद त्रिपाठी, कश्यप तपोभूमि क्षेत्र समितिका अध्यक्ष आनन्द प्रसाद अधिकारीले कश्यप तपोभुमि र संजालका गतिविधि बारेमा बेलेका थिए ।
सञ्जालका संयोजक विशाल तिमिल्सिनाको अध्यक्षतामा सम्पन्न कार्यक्रमको संचालन व्यवस्थापन संयोजक तीर्थराज अधिकारीले गरेका थिए ।