लगातार पानी परेपछि त्रिवेणीस्थित गण्डक ब्यारेजमा पानीको सतह बढेको छ ।

शनिबार बिहान साढे ७ बजे त्रिवेणीस्थित जलमापन केन्द्रले दिएको सूचनाअनुसार पानीको सतह करिब १० मिटरको लेभलमा पुगेको छ । त्यहाँ पानीको सतह ११ मिटर पुगेपछि खतराको तह भन्ने बुझिन्छ ।

लगातारको झरीले नारायणी नदी र त्यससँग जोडिएका खोलमा बाढी आएका कारण गण्डक नदीमा पानीको सतह बढेको हो ।

गण्डकबाट भारतले उत्तर प्रदेश र बिहारमा सिचाइँका लागि पानी लगेको छ । बिहार र उत्तरप्रदेशका क्षेत्रमा डुबानको खतरा बढेपछि भारतले गण्डक ब्यारेजका ढोका खोल्ने गर्छ ।

प्रहरी चौकी त्रिवेणीका अनुसार गण्डक ब्यारेजमा सबैजसो ढोका केही माथि उचालिए पनि पुरै खोलिएको छैन । भारतमा डुबानको खतरा बढ्दै गएपछि गण्डक ब्यारेजका सबै ढोका खोलेर नदीमै पानी पठाइन्छ ।

गएको बिहीबारयता गण्डकी प्रदेशको अधिकांश स्थानमा लगातार झरी परेको छ । नारायणीमा मिसिने नदी तथा खोलामा भल र बाढीले नारायणी नदीमा (त्रिवेणीमा गण्डक भनिन्छ) पानीको सतह बढेको हो ।