स्याङ्जाको अर्जुनचौपारी गाउँपालिका -१ जिरोमा स्थित भगवतीमाई बहुउद्देश्यीय सहकारी लिमिटेडले मेसिनबाट पातका दुना टपरी बनाउन सुरु गरेको छ । मेसिनबाट साल, कटुस, चिउरी लगायतका पातहरुबाट दुना टपरी बनाएर बिक्रीवितरण गर्न थालिएको हो ।

पालिकाभित्रका महिलाहरुलाई आय आर्जनमा जोड्ने उद्देश्यले मेसिन ल्याएर दुना टपरी बनाउन थालेको सहकारीका संरक्षक टुकराज अर्यालले जानकारी दिए । उनले जङ्गलबाट ल्याइएका पातलाई जोडेर आकार दिने र मेसिनले च्यापेर दुना टपरी बनाइने बताए । पातलाई सिन्कोले जोड्ने र कत्रो आकारको बनाउने भन्ने महिलाहरुले तय गर्ने र अन्त्यमा मेसिनले च्यापेर दुना टपरी बनाइने छ ।

उक्त मेसिनले पाँचवटा डाईमार्फत साना दुनादेखी ठुला टपरी बनाउने छ । पात खोजेर ल्याएर मेसिनमा हाल्ने बनाएको कच्चापदार्थको सानाको एक रुपियाँ र ठुलाको तीन रुपियाँसम्म महिलाहरुले पारिश्रमिक पाउनेछन् भने दुनाको प्रति गोटा तीन रुपियाँ र टपरीको आठ रुपियाँसम्म पर्नेछ ।

स्थानीय आमा, दिदिबहिनीले बनाएर ल्याएको पातको कच्चापदार्थलाई मेसिनबाट दुना टपरी बनाउने काम सहकारीमा रहेका कर्मचारीले गर्नेछन् । दुईवटा पातबाट सिधै दुना बन्ने र सिन्कोले जोडेर टपरी बनाइने सहकारीले जनाएको छ ।

विशेषगरी विवाह, बर्तबन्ध र पुजा पाठमा प्रयोग हुने दुना टपरी अब बाहिरबाट ल्याउन नपर्ने पालिका बनाउने सहकारीका संरक्षक अर्यालले बताए । उनले पातबाट कच्चापदार्थ बनाएर पहिलो चरणमा २० जना आमा, दिदिबहिनीहरु आय आर्जनमा जोडिएका बताए ।

सहकारी आफैंले दुई लाख ९४ हजार रुपियाँमा मेसिन खरिद गरेर ल्याएको हो । उक्त मेसिनबाट एकदिनमा दुई हजार पाँच सयवटा टपरी र दुना बन्ने जानकारी दिँदै बाहिरबाट माग भए बिक्रीवितरण समेत गर्ने अर्यालले बताए ।

स्थानीय तहमै दुना टपरी बनाउने र बिक्रीवितरण गर्ने कामको सुरुवात गर्दै गाउँपलिकाका अध्यक्ष प्रकाश तिवारीले महिलालाई आय आर्जनमा जोड्न गरिने हरेक काममा पालिकाको सहयोग रहने बताए ।