म्याग्दी । गण्डकी प्रदेशमा रहेका यातायात कार्यालयमा गत आर्थिक वर्ष २०८०/८१ मा २ अर्ब ६३ करोड २४ लाख ५ सय २९ राजस्व संकलन भएको छ ।

बागलुङ, डुम्रे र नवलपुरमा एक/एक र कास्कीमा २ यातायात कार्यालय, गोरखा, लमजुङ र स्याङ्जामा रहेको यातायात सेवा कार्यालयले सो राजस्व सङ्कलन गरेको भौतिक पूर्वाधार विकास तथा यातायात व्यवस्था मन्त्रालयले जनाएको छ ।

आव २०७८/७९ मा २ अर्ब २४ करोड र २०७९/८० मा ३ अर्ब १७ करोड राजस्व संकलन गरेका थिए । मन्त्रालयको यातायात शाखाका प्रमुख अनिल सुवेदीले सवारी खरिद/बिक्रीमा भएको गिरावटको असर राजस्वमा परेको दाबी गरे ।

‘सवारी करको दर यथावत भए पनि खरिद बिक्रीमा आएको कमीले राजस्व संकलन घटेको हो,’ उनी भन्छन् ।

यातायात व्यवस्था कार्यालय बागलुङका प्रमुख गुमादेवी शर्माले यसअघि दैनिक १० देखि १२ वटा सवारीसाधन खरिद बिक्री हुनेमा हिजोआज दैनिक एक/दुई वटामात्र हुने गरेको सुनाइन् ।

मन्त्रालयका अनुुसार गत आवमा सबैभन्दा बढी यातायात व्यवस्था कार्यालय सवारी कास्कीले १ अर्ब ४२ करोड ३० लाख ४० हजार ६ सय २४ राजस्व संकलन गरेको छ ।

यातायात व्यवस्था कार्यालय सवारी चालक अनुुमतिपत्र कास्कीबाट २४ करोड ६ लाख २६ हजार ६ सय ७९, बागलुुङमा १९ करोड १६ लाख ९ हजार ९ सय २८, नवलपुुरमा ३० करोड ३५ लाख ५३ हजार ९ सय ५३ र डुुम्रेमा २० करोड चार लाख ७० हजार ५ सय ९२ राजस्व संकलन भएको छ ।

गोरखामा १२ करोड ४७ लाख ५८ हजार ७ सय ५७, लमजुङमा ४ करोड ६१ लाख ११ हजार ७ सय ५५ र स्याङ्जामा १ करोड २२ लाख २८ हजार २ सय ४० राजस्व संकलन भएको मन्त्रालयले जनाएको छ ।

सवारी चालक अनुमतिपत्र जारी, नवीकरण, सवारी साधन दर्ता, नवीकरण र जरिवाना लगायत शीर्षकमा राजस्व संकलन भएको हो । यातायात कार्यालय गण्डकी प्रदेश सरकारमा सबैभन्दा बढी राजस्व संकलन गर्ने निकाय हुन् । यातायात कार्यालयको सेवालाई प्रविधिको प्रयोगमार्फत पहुँचयोग्य, झन्झटमुक्त र छरितो बनाउने प्रयास गरेको मन्त्रालयका सचिव शंकरप्रसाद पण्डितले दाबी गरे । रासस