पोखरा । न्याय परिषद्को बैठकले न्याय सेवाबाट २५ जना, सरकारी वकिलबाट ६ जना र कानुन सेवाबाट ४ जनालाई जिल्ला न्यायाधीशमा सिफारिस गरेको छ ।

प्रधानन्यायाधीश विश्वम्भरप्रसाद श्रेष्ठको नेतृत्वमा बसेको परिषद्को बैठकले उनीहरूको सिफारिस गरेको हो । यसरी सिफारिस हुनेमा यसअघि जिल्ला न्यायाधीशको परीक्षामा सहभागी भई असफल भएकाहरू पनि अटाएका छन् । उच्च र सर्वोच्च अदालतमा पनि न्यायाधीश रिक्त रहेका छन् ।

उच्च अदालतमा १० र सर्वोच्च अदालतका ४ जनाको पद रिक्त रहेको छ । न्यायाधीश अभावको समस्या सबैभन्दा धेरै सर्वोच्चले भोगिरहेको छ । तर परिषद्ले जिल्लाबाट नियुक्तिको थालनी गरेको हो ।

उच्च अदालत पोखराको मुख्य न्यायाधीशमा डा. रत्नबहादुर बागचन्द आउने भएका छन् । उनी उच्च अदालत जनकपुर, अस्थायी इजलास वीरगञ्जका न्यायाधीश थिए । उनको ठाउँमा यहाँका का.मु.न्यायाधीश राजनप्रसाद भट्टराई गएका छन् ।

राजस्व न्यायाधीकरण पोखराको कानुन सदस्य एवं अध्यक्ष पदमा अब भट्टराईको सट्टामा उच्च अदालत पोखराकै न्यायाधीश सुदर्शनराज पाण्डेलाई तोक्ने निर्णय भएको छ ।

कास्की जिल्ला अदालतमा डोल्पाबाट भोलानाथ ढकाल, अर्घाखाँचीबाट कृष्णजंग शाह आउने भएका छन् । कास्की जिल्ला अदालतका न्यायाधीश रामचन्द्र शर्माको डँडेलधुरा जिल्ला अदालतमा सरुवा भयो । उच्च अदालत पोखरा, बागलुङ इजलासमा सर्वोच्चका इजलास अधिकृत लालसिंह थापा आउने भएका छन् ।