स्याङ्जाको पुतलीबजार नगरपालिका -१ मा रहेको जिल्ला कारागारका कैदीबन्दीहरु निजी स्वास्थ्य संस्थामा निर्भर रहेका छन् । कारागारमा स्वास्थ्यकर्मी नभएकाले उपचारका लागि कैदीबन्दीहरु निजी स्वास्थ्य संस्थामा निर्भर रहनुपरेको हो ।

सरकारले कैदीबन्दीलाई निःशुल्क उपचारको व्यवस्था गरेको र हरेक कारागारमा स्वास्थ्यकर्मीको दरबन्दी समेत कायम गरेको छ । सरकारले स्याङ्जा जिल्ला कारागारमा पनि पाँचौं तहको स्वास्थ्यकर्मीको दरबन्दी लागू गरेतापनी कारागारले स्वास्थ्यकर्मीको अभाव झेलेको जेलर दिनेश शर्मा मरासिनीले जानकारी दिए ।

कारागारमा दरबन्दी कायम पश्चात् अहेव मनोज कुमार यादवले केवल दुई वर्ष मात्र सेवा दिई २०७९ असार २४ गते रौतहट कारागारमा सरुवा गरेर गएका थिए । उनी सरुवा गरेर गएसङ्गै यहाँका कैदीबन्दीहरु निजि स्वास्थ्य संस्था, मेडिकलमा निर्भर हुन बाध्य रहेका छन् ।

अहेव सरुवा गरेर गएसङ्गै दुईपटक लोकसेवामा माग गरेपनी स्वास्थ्यकर्मी नपठाइएको जेलर शर्माले बताए । उनले दरबन्दी अनुसारको स्वास्थ्यकर्मी नभएपछि कहिले निजी स्वास्थ्यकर्मी ल्याएर त कहिले जोखिम मोलेर मेडिकल लगेर उपचार गर्नुपरेको बताए ।

नेपाल सरकारले नि: शुल्क उपचारको व्यवस्था गरेको भए पनि कारागारमा स्वास्थ्यकर्मी नहुँदा मेडिकलमा रकम खर्च गरेर उपचार गर्नु परेको कैदीबन्दीको गुनासो रहेको छ ।