भौतिक पूर्वाधार विकास तथा यातायात मन्त्रालयबाट हटाएर वन तथा वातावरण मन्त्रालयको जिम्मेवारी दिएपछि गण्डकी प्रदेशसभाका सांसद राजीव गुरुङ (दीपक मनाङे) असन्तुष्ट बनेका छन् ।

सोमबार मुख्यमन्त्री सुरेन्द्रराज पाण्डेले कार्यविभाजन गर्दा मनाङेलाई भौतिक पूर्वाधार विकास तथा यातायात मन्त्रालयबाट हटाए । मन्त्रीमा निरन्तर राखेपनि पाण्डेले मन्त्रालय फेरिदिएका हुन् ।

तीन पटक खेलकुद मन्त्रालय सम्हालेका मनाङेलाई पाण्डेले नै सत्ता जोगाउन भौतिक पूर्वाधार जस्तो मालदार मन्त्रालय सुम्पेका थिए । त्यसपछि खगराज अधिकारीले पनि सोहि मन्त्रालयमा राखे भने पाण्डे पुनः मुख्यमन्त्री बन्दासमेत उक्त मन्त्रालय नै सुम्पेका थिए ।

आज नवनियुक्त चार मन्त्रीको शपथग्रहण समारोहमै उनी रिसाएका थिए । त्यसपछि कसैसँग नबोली निस्किए । निस्कने बेला उनले `यस्तो मन्त्रालय जुनियरलाई दिने हो’ भनेका थिए ।

उनी पदभार ग्रहण गर्न गएनन् । उनले राजीनामा दिने बताएका छन् । मनाङे मुख्यमन्त्री सुरेन्द्रराज पाण्डेलाई भेट्न मुख्यमन्त्री कार्यालय पनि पुगे ।

संसदको अघिल्लो कार्यकालमै तीन पटक मन्त्री भएर रेकर्ड राखेका मनाङे त्यसपछि अहिले पनि ३ पटक मन्त्री भइसकेका छन् । आज भने मन्त्रालय परिवर्तन भएको हो । चुनाव नै नलडी निर्विरोध प्रदेश सभा सदस्य बनेका मनाङे ६ पटक मन्त्री बन्दै रेकर्ड राखेका प्रदेश सांसद हुन् ।