पोखरा । कास्कीको माछापुच्छ्रे गाउँपालिका ८, ल्वाङमा १९ फिट अग्लो बुद्ध मूर्ति र बुद्ध पार्क स्थापना गरिएको छ ।

पोखरा १, सिम्पानी निवासी बलबहादुर र देवसुवा गुरुङ दम्पतीले आफन्तको स्मृतिमा उक्त मूर्ति स्थापना गरेका हुन् । ल्वाङ गाउँबाट चियाबगान जाने उकालोमा उक्त मूर्ती स्थापना गरिएको स्थानीय भरत गुरुङले जानकारी दिए ।

बाजे धर्मराज गुरुङ, बज्यै माया गुरुङ, बुवा दिलबहादुर र आमा तुलसी गुरुङको स्मृतिमा उक्त मूर्ति स्थापना गरिएको हो । गुरुङ दम्पतीले निर्माणमा ३० लाख २४ हजार सहयोग गरेका हुन् ।

शुक्रबार उक्त मूर्तिको गुरुङ दम्पतीले नै अनावरण गरे । त्यस क्रममा लामा धर्मगुरु खेम्पो कुङ्गा ढुन्दुक र लामा टाशी वान्गेलको नेतृत्वमा पूजाआजा गरिएको थियो । कार्यक्रममा ल्वाङवासी तथा पोखरा, काठमाडौं र विदेशबाट आएका शुभेच्छुक र चन्दादाताको उपस्थिति थियो ।

यसबाट ल्वाङमा अर्को पर्यटकीय गन्तव्य थपिएको उनले बताए । ‘ल्वाङ गाउँमा आउने पर्यटकहरु एकपटक चियाबगान हेर्नका लागि पुगिहाल्छन्,’ उनले भने, ‘यो मूर्ति बगान जाने बाटोमै बनाइएको छ । जसले गर्दा उकालोको थकान मेटाउन यसले सघाउनेछ ।’