पोखरामा ऋग्वैदिक हिमालय  द्वितीय अन्तर्राष्ट्रिय सम्मेलन हुनेको भएको छ ।

मुक्त फाउण्डेशन, सुलक्षण कीर्ति क्याम्पस, गण्डकी प्रज्ञा प्रतिष्ठान, युनिभर्सिटी ग्राण्ट कमिसनको  आयोजना तथा संयोजनमा पोखराको गण्डकी प्रज्ञा प्रतिष्ठानमा सम्मेलन हुने मुक्त फाउण्डेशनका अध्यक्ष तथा सम्मेलनका स‌ंयोजक दामोदर त्रिपाठीले जानकारी दिए ।

यही मंसिर २२ र २३ गते हुने सम्मेलनमा वैदिक ज्ञान तथा आधुनिक समाज विज्ञानसँग सम्बन्धित विज्ञहरूबाट हिमाली समाज र संस्कृतिका बारेमा खोज तथा अनुसन्धानात्मक विचार तथा कार्यपत्रहरू प्रस्तुत हुने त्रिपाठीले जनाए ।

दुई दिनसम्म चल्ने सम्मेलनमा नेपाल, भारत, दक्षिणपूर्वी एसिया, युरोप र अमेरिकाबाट आउने ४० जना भन्दा बढी विज्ञहरूबाट प्राज्ञिक कार्यपत्रहरु प्रस्तुत गरिने कार्यक्रम छ ।

सम्मेलनमा १० भन्दा बढी विदेशी प्रस्तोताहरूले अनलाइन माध्ययमबाट कार्यपत्र प्रस्तुत गर्नेछन् । सुन्दर पर्यटकीय नगर पोखरामा विदेश तथा देशका विभिन्न विश्वविद्यालय, कलेज र शैक्षिक तथा साँस्कृतिक र पर्यटकीय क्षेत्रमा आवद्ध २ सय जना भन्दा बढी व्यक्तित्वहरूको उपस्थिति र सहभागिता सम्मेलनमा रहने त्रिपाठीले खुलाए ।

‘सम्मेलनमा नेपालको हिमाली पर्यावरण, हिमाली सभ्यता र संस्कृति बीचको अन्तर सम्बन्ध र यसमा आधारित वैदिक ज्ञान विज्ञान तथा विचारहरूका सम्बन्धमा छलफल र बहस हुनेछ ।’ उनले भने ।

सम्मेलनलाई सफल रुपमा सञ्चालन गर्न तीनै तहका सरकारसँग पहल गरिरहेको त्रिपाठीले जानकारी दिए ।

यस सम्मेलनबाट प्राप्त उपलब्धि र भावी योजनाका सम्बन्धमा पनि सबै सरोकारवाला पक्षहरूसँग सहकार्य र समन्वय गर्ने प्रेस संयोजक मदनमणि तिमिल्सिनाले जानकारी दिए।