काठमाडौँ । भक्तपुरको सूर्यविनायक नगरपालिका–२, बालकोटमा बाबुछोरा मृत भेटिएको प्रकरणमा प्रहरीले एक जनालाई नियन्त्रणमा लिएको छ ।

खोटाङको दिक्तेल रुपाकोट मझुवागढी नगरपालिका–१ का ५६ वर्षीय कुलप्रसाद आचार्य र उनका कान्छो छोरा २२ वर्षीय प्रविण सोमबार (हिजो) मृत अवस्थामा फेला परेका थिए ।

मंगलबार बिहान उपत्यका अपराध अनुसन्धान कार्यालयको टोलीले कुलप्रसादको जेठो छोरा मिलन आचार्यलाई महाराजगञ्जबाट पक्राउ गरेको हो ।

भक्तपुरको बालकोटस्थित एक घरमा दाजुभाइ मिलन र प्रविण कोठा भाडामा लिएर बस्दै आएका थिए । उनीहरूलाई भेट्न कुलप्रसाद केही दिनअघि मात्र खोटाङबाट आएका थिए । सोही कोठामा बाबुछोरा मृत फेला परेका थिए ।

प्रहरीको अनुसन्धानका क्रममा मिलन शनिबार राति कोठाबाट बाहिर निस्किएको सीसीटीभी फुटेजमा देखिएको थियो । प्रहरीले उनीमाथि सोधपुछ गरिरहेको छ । प्रारम्भिक अनुसन्धानका क्रममा उनले हत्या स्वीकार गरिसकेकोसमेत जनाइएको छ ।