पोखराको फेवातालमा आइतबारदेखि दोस्रो संस्करणको ड्रागन बोट रेस फेस्टिभल सुरु भएको छ।

गण्डकी प्रदेश सरकार, पोखरा महानगरपालिका, नेपालस्थित चिनियाँ दूतावास र नेपाल पर्यटन बोर्डको संयुक्त आयोजना तथा नेपाल ड्रागन बोट एसोसिएसन, पोखरा पर्यटन परिषद् र पोखरा ओभरसिज चाइनिज एसोसिएसनको सहआयोजनामा फेस्टिभल सुरु भएको हो।

प्रतियोगिताको युवा तथा खेलकुद मन्त्री तेजुलाल चौधरीले उद्घाटन गर्दै यसप्रकारका खेलले पोखराको पर्यटन प्रबर्द्धनमा मात्रै नभई नेपाली र चिनियाँ नागरिकबीच सुमधुर सम्बन्ध कायम गर्न सघाउने बताए।

दुई दिन चल्ने प्रतियोगितामा २० समूहले सहभागिता जनाएका छन्। जसमा नेपालका ११, चीन ८ र सिंगापुरका एक टिम छन्। २०० मिटर र ५०० मिटर दुरीमा हुने प्रतिस्पर्धामा विजेता समूहले समान ५ हजार अमेरिकी डलर प्राप्त गर्नेछन्। उपविजेताले २ हजार डलर र तेस्रोले १ हजार २०० डलर पुरस्कार प्राप्त गर्नेछन्।

अन्य १७ समूहलाई प्रतिसमूह ५ सय डलर प्रदान गरिने छ। ड्रागन बोट रेसमा सहभागी हुने चीनियाँ खेलाडी, प्राविधिक र पाहुनासहित १२९ जनालाई बोकेर सिचुवान एयरलाइन्सको विमानको गत ११ पुसमा चीनको छिन्चुबाट चार्टर उडानमार्फत पोखरा आएको थियो।

प्रतियोगितामा गण्डकी, बागमती, कर्णाली, त्रिभुवन आर्मी क्लब, ड्रागन बोर्ट गण्डकी, बेगनास टोली, रुपाताल टोली र नेपाल र्याफ्टिङ एजेन्सिज एशोसिएशन (नारा) सहित नेपालका ११ टोलीको सहभागी छन् ।

यो खेल चीनको प्रमुख चार परम्परागत पर्वमध्येको एक हो । परम्परागत चिकित्सा र स्वास्थ्य उत्सवको रूपमा मनाइने ड्रागन बोटरेस फेस्टिभल पोखराको फेवातालमा गत असारमा पनि भएको थियो। एउटा टिममा १२ जना खेलाडी हुन्छन्।

पोखरामा शनिबारदेखि सडक महोत्सव सुरु भएकोमा थप ड्रागन बोट रेसका कारण लेकसाइडमा रौनक छाएको छ। उता, फेवातालको सिरान पामेमा बेलुन फेस्टिभल जारी छ।