स्याङ्जाको पुतलीबजार नगरपालिका – ९ काल्खुमा चैत्र पूर्णिमाको अवसरमा ऎतिहासिक काल्खु मेला हुने भएको छ ।

विगत लामो समयदेखि नै चैत्र पूर्णिमाको अवसर पारी चैत्र पूर्णिमादेखि पञ्चमीसम्म सञ्चालन हुँदै आइरहेको ऎतिहासिक काल्खु मेला यस वर्ष पनि हुने भएको हो ।

जनसम्पर्क युवा क्लब काल्खुले ‘आजको आवश्यकता समाज विकासमा युवा अपरिहार्यता’ भन्ने मूल नाराका साथ यहि चैत ३० देखि बैशाख ५ गतेसम्म मेला सञ्चालन गर्ने तय भएको जनाएको छ ।

उक्त मेलामा जलकन्या उत्तरादेवी मन्दिरको दर्शन, साविक वडा/गाउँ स्तरीय पुरुष भलिबल प्रतियोगिता, खुल्ला नृत्य प्रतियोगिता, छेलो हान्ने, रसि तान्ने, कुर्सी दौड, घैंटो फुटाउने प्रतियोगिता, विभिन्न सांस्कृतिक कार्यक्रमहरु साथै राष्ट्रिय स्तरमा ख्यातिप्राप्त कलाकारहरुको प्रस्तुतिसहित लाईभ दोहोरी रहने बताइएको छ ।

त्यस्तै, पुरुष भलिबल प्रतियोगितामा विजेता टिमले ८१ हजार, पहिलो उपविजेता टिमले ४१ हजार र दोस्रो उपविजेता टिमले २१ हजार नगदसहित ट्रफी, मेडल र प्रमाणपत्र पाउनेछन् भने अनुशासित टिमले १२ हजार नगदसहित मायाको चिनो र प्रमाणपत्र प्राप्त गर्नेछ ।

यसैगरी, खुल्ला नृत्य प्रतियोगितातर्फ प्रथम हुनेले आठ हजार, द्वितीय हुनेले छ हजार, तृतीयले चार हजार र सान्त्वना हुनेले दुई हजार नगदसहित ट्रफी र प्रमाणपत्र प्राप्त गर्नेछन् । स्थानीय कला, सांस्कृतिक प्रदर्शन प्रतियोगितातर्फ प्रथम पुरस्कार १० हजार द्वितीय पुरस्कार पाँच हजार रहेको छ भने उपस्थित सम्पूर्ण टिमलाई दुई हजार पाँच सय रुपैयाँ प्रदान गरिनेछ ।