पोखरा । होटल संघ पोखरा नेपालको आयोजनामा पोखरामा आन्तरिक एवं बाह्य पर्यटन प्रवद्र्धन गर्ने उद्देश्यले २० औं फेवा नव वर्ष महोत्सव सुरु भएको छ । नयाँ वर्ष–२०८२ अवसरमा शनिबारदेखि सुरु महोत्सव १ वैशाखसम्म चल्नेछ ।

लेकसाइडको अम्बोटमा आयोजित समारोहमा पोखरा महानगरपालिकाका प्रमुख धनराज आचार्यले महोत्सवको उद्घाटन गरे । उनले पोखरा नेचर, कल्चर एड्भेञ्चर तिनै हिसाबले उत्कृष्ट रहेको बताउँदै उनले यस्तो विशिष्टताको अनुभव गर्न सकिने बनाउने दायित्व पर्यटन व्यवसायीको भएको जनाए ।

पोखराको यातायात क्षेत्र आधुनिक र प्रविधिमैत्री बनाउने कार्य अगाडि बढिसकेको उनले जानकारी दिए । पोखरालाई पर्यटनको राजधानी घोषणा गरेपछि पर्यटनमा यसको प्रभाव सकारात्मक परेको बताउँदै उनले नयाँ विमानस्थलबाट नियमित अन्तर्राष्ट्रिय उडान थपिंदै जाने विश्वास व्यक्त गरे ।

होटल संघ नेपाल अध्यक्ष विनायक शाहले पर्यटनबाट मात्र आर्थिक समृद्धि सम्भव रहेको बताए । उनले पोखरामा पर्यटनसम्बन्धी लगानी र ब्राण्डहरु थपिंदै गएको र यो सुखद पक्ष भएको सुनाए ।

होटल संघ नेपालका केन्द्रीय सदस्य एवं आयोजक संघको सल्लाहकार परिषद् संयोजक भरतराज पराजुलीले फेवातालको माथिल्लो भागमा माटो निकाली सानो ताल बनाएर त्यहाँ जल गतिविधि संचालन गर्न सकिने सुझाव दिए ।

कार्यक्रममा पोखरा उद्योग वाणिज्य संघका अध्यक्ष गोकर्ण कार्की, कास्कीका प्रमुख जिल्ला अधिकारी भरतमणि पाण्डे र महिला सञ्जाल वडा ६ अध्यक्ष बबिता मल्लले पनि भनाइ राखेका थिए ।

यसअघि, खहरे र ड्यामसाइडबाट निकालिएका आमा समूहसहितका विशाल झाँकीसहितका ¥याली सभास्थलमा पुगेका थिए । एसके डान्स ट्रेनिङका कलाकारले सो अवसरमा नाच देखाए ।

निःशुल्क प्रवेशको व्यवस्था गरिएको महोत्सव तिनै दुई स्थलबीचको सडकमा संचालन हुनेछ । पञ्चैबाजा, भजन र रत्यौली जस्ता नेपाली मौलिक बाजा र नाच महोत्सवका आकर्षण हुन् । महोत्सवमा यसपटक भक्तपुरको विस्केट जात्रा विशेष आकर्षण छ ।

पर्यटन, संस्कृति र खाना फेवा महोत्सवका मुख्य आकर्षण रहेका छन् । महोत्सवका अवसरमा संघ अन्तर्गतका सदस्य होटलले आफ्नो प्रकाशित दररेटमा २० प्रतिशत छुट प्रदान गर्दै छन् । अहिले पोखराका ८० प्रतिशत होटलको अकुपेन्सी ८० प्रतिशत नै पुगेको आयोजक संघका अध्यक्ष एवं महोत्सवका संयोजक लक्ष्मण सुवेदीले जानकारी दिए । महोत्सवले पोखराको आर्थिक क्षेत्र चलायमान बनाउन मद्दत पुग्ने उनले बताए । आन्तरिक पर्यटन प्रवद्र्धन गर्ने र नेपाली मौलिक संस्कृतिको संरक्षण गर्ने उद्देश्य महोत्सवले लिएको उनले सुनाए ।

प्रदेशस्तरीय मौलिक तथा रैथाने परम्परागत खानाको प्रदर्शन, सांस्कृतिक कार्यक्रमहरुको प्रस्तुति, मनोरञ्जनात्मक खेलकुद कार्यक्रम र पर्यटक दौड प्रतियोगिता महोत्सवका आकर्षण रहेका छन् । संस्थागत व्याडमिन्टन कप प्रतियोगिता यसपटकको नयाँ आकर्षणको रुपमा रहेको छ ।

स्थानीय एवं प्रख्यात कलाकारद्वारा प्रत्यक्ष पप कन्सर्ट, कृषि एवं हस्तकलाका सामानको प्रदर्शनी तथा स्थानीय तथा प्रख्यात कलाकारद्वारा लोकदोहोरी कार्यक्रम पनि महोत्सवमा प्रस्तुत हुनेछ ।

उद्घाटन कार्यक्रमको संचालन संघका महासचिव राजेन्द्र ढकालले गरेका थिए ।

३ दिनसम्म चल्ने महोत्सवको मुख्य प्रायोजक गोर्खा ब्रुअरी प्रालि हो । प्रवद्र्धकमा नेपाल पर्यटन बोर्ड गण्डकी प्रदेश र पोखरा महानगरपालिका हुन् ।