परराष्ट्रमन्त्री डा. आरजु राणा देउवाले सरकार फेरिने कुनै सम्भावना नभएको बताएकी छिन्।

थाइल्यान्ड भ्रमणबाट फर्किएपछि विमानस्थलमा पत्रकारहरूसँग कुरा गर्दै यो विषय हल्ला मात्र भएको बताइन् ।

साथै यो विषयमा समाचार आएपछि बिहीबार बेलुका कांग्रेस सभापति शेरबहादुर देउवा र प्रधानमन्त्री केपी ओलीबिच टेलिफोनमा कुराकानी भएको उनले खुलाइन् ।

पत्रकारले राखेको जिज्ञासामा भनिन्, “उहाँ  (शेरबहादुर देउवा) राजनीतिक भेट गर्न जानुभएकै होइन । सरकार ढल्ने हल्ला हामीले पनि त्यहीँ सुन्यौँ । अलिअलि इन्टरटेनमेन्टका लागि आएको समाचारजस्तो लाग्यो । सरकार परिवर्तन हुने भए भित्रैबाट हुन्छ । थाइल्यान्ड जानुपर्दैन । हामी पनि यी समाचार हेरेर छक्क पर्‍याैँ, बेलुकाचाहिँ सभापतिज्यू र प्रधानमन्त्रीज्यूको यसबारे कुराकानी (टेलिफोनमा) पनि भएको छ ।’

थाइल्यान्डमा सभापति देउवाको कोहीसँग भेटघाट नभएको आरजुको दाबी छ। गत ७ वैशाखमा गएका देउवादम्पती शुक्रबार फर्किएका हुन्।