पोखराको शैक्षिक क्षेत्रमा अब्बल पहिचान बनाएको सामुदायिक विद्यालय अमरसिंह माविले गुण र चरित्र नभएका अपराधिक मनोवृत्तिका शिक्षकका कारण बदनामी खेपिरहनुपरेको छ ।

पोखरा १० रामघाट स्थित उक्त  विद्यालयका कम्प्युटर शिक्षक दिपक दाहालले आइतबार पनि एक विद्यार्थीलाई मरणासन्न हुने गरी कुटपिट गरेका छन् । कक्षा १० (ख) मा पढ्ने छात्र अच्युत खड्कामाथि कम्प्युटर शिक्षक दाहालले निर्घात कुटपिट गर्दा अस्पताल भर्ना हुनुपरेको छ ।

यसअघि पनि विद्यालयमा एकजना विद्यार्थीको हात नै भाँचिदिएको खुलेको छ । पटक-पटक विद्यार्थी यसरी कुटिइरहँदा पनि विद्यालय प्रशासनले कडाईका साथ कारवाही नगर्दा यस्ता घटना दोहोरिरहेको छ ।

शिक्षक दाहालले खड्काको देब्रे कन्चट र कानको बीचको जोर्नींमा मुक्कै मुक्काले हानेको कक्षाका अरू विद्यार्थीले बताएका छन् ।  रिसले विक्षिप्त बनेका शिक्षक दाहालको कुटाईबाट विद्यार्थीको अनुहार भरी पनि चोट लागेको छ । घाइते विद्यार्थीको पार्कल्याण्ड हस्पिटल अमरसिंहमा उपचार गरिएको छ ।

घाइते विद्यार्थीको कानमा बढि चोट लागेको र श्रवण क्षमतामा समस्या देखिएको उपचारमा संलग्न अभिभावकले बताएका छन् । घाइते विद्यार्थीका अनुसार आइतबार अन्तिम पिरियडमा ट्युसन क्लासका विषयमा जानकारी दिईरहँदा सामान्य हाँसेको विषयलाई लिएर उनीमाथि निर्घात कुटपिट भएको थियो ।

शिक्षक पेशाका जिम्मेवार व्यक्तिबाट यस्तो अमानवीय र आपराधिक व्यवहार पूर्ण रूपमा निन्दनीय भन्दै कारबाहीका मागहरू भइरहेका छन् । विद्यालय शिक्षाको मन्दिर भएपनि यस्ता घटनाले शिक्षण पेसाको बदनाम गराइरहेको छ।