मुगु । मुगुको छायाँनाथ रारा नगरपालिका १२ स्थित लुम्स गाउँमा करेन्ट लागेर १० वटा खच्चड मरेका छन् ।

आइतबार राति १० बजेतिर राष्ट्रिय विद्युत् प्रसारण लाइनको करेन्ट लागेर लुम्स गाउँका तीन किसानका १० खच्चड मरेका हुन् ।

मरेका खच्चडहरूमा छायानाथ– १ का कर्णबहादुर मल्लका चार, वडा नं १० का जग्गी बढुवालका तीन र पृथ्वीबहादुर ऐडीका तीन–तीनवटा रहेका छन्।

जिल्ला सदरमुकाम गमगढीबाट सामान बोकेर मुगुम कार्मारोङ गाउँपालिकातर्फ जाँदै गरेका ती खच्चडलाई नेपाल विद्युत् प्राधिकरण गमगाढ वितरण केन्द्रको ट्रान्समिटरबाट चुहावट भएको करेन्ट लागेको थियो।

गत शुक्रबार मात्र पनि वडा नं १२ कम्फागाउँ निवासी खड्कबहादुर बुढाको भैँसी करेन्ट लागेर मरेको थियो।

अहिले करेन्ट लागेर खच्चड मरेको आसपासमा जान रोक लगाइएको छ ।

विद्युत् प्राधिकरणको लापरबाहीका कारण यस्तो घटना भएको भन्दै स्थानीयले मरेका खच्चडको क्षतिपूर्ति दिन र विद्युत् सुरक्षित रुपमा जडान गर्न माग गरेका छन् ।