पोखरा । गण्डकी प्रदेश सरकारले आगामी आर्थिक वर्ष २०८२/८३ का लागि प्रस्तुत गरेको बजेट प्रदेश सभाबाट बहुमतले पारित भएको छ ।

शुक्रबार बसेको प्रदेश सभा बैठकले सत्तापक्ष र प्रतिपक्ष सांसदहरूको आलोचनाका बाबजुद बजेट पारित गरेको हो । आर्थिक मामिला मन्त्री डा. टकराज गुरुङले १ असारमा प्रदेश सभामा प्रस्तुत गरेको ३१ अर्ब ९७ करोड ९९ लाख ९९ हजार रुपैयाँको बजेटको पक्षमा सत्तारुढ दल नेपाली काँग्रेस र नेकपा (एमाले)का सांसदले मतदान गरेका थिए।

प्रमुख प्रतिपक्षी दल नेकपा (माओवादी केन्द्र) ले बजेटको विपक्षमा मतदान गर्‍यो भने राष्ट्रिय प्रजातन्त्र पार्टी (राप्रपा) तटस्थ बस्यो । आगामी आर्थिक वर्षको बजेट चालु आर्थिक वर्षको भन्दा ९९ करोड ८५ लाख ७६ हजार रुपैयाँले कम हो । चालु आर्थिक वर्षका लागि प्रदेश सरकारले ३२ अर्ब ९७ करोड ८५ लाख ७५ हजार रुपैयाँको बजेट ल्याएको थियो ।