नयाँ आर्थिक वर्षको प्रारम्भसँगै जिल्ला प्रहरी कार्यालय स्याङ्जाले आइतबार पत्रकार सम्मेलनमार्फत गत आर्थिक वर्ष २०८१/०८२ को उपलब्धी तथा चालू वर्षका कार्यप्रगति सार्वजनिक गरेको छ ।

सम्मेलनमा अपराध नियन्त्रण, जनचेतना, सुरक्षासम्बन्धी गतिविधि, राजस्व संकलनमा हासिल उपलब्धी, र कानूनी कार्यान्वयनका विविध पक्षमा प्रहरीको सक्रियता र सफलता प्रस्तुत गरिएको थियो ।

फरार अपराधीहरूलाई पक्राउ गर्ने कार्यलाई पहिलो प्राथमिकतामा राखेको बताउँदै एसपी न्यौपानेले गत आर्थिक वर्षमा विभिन्न मुद्दामा फरार रहेका ११८ जनालाई पक्राउ गरिएको बताए । तीमध्ये ९१ पुरुष र २७ महिला रहेका छन्, जसले कूल ४२ वर्ष १ महिना २९ दिन कैद सजाय भोग्नु पर्नेछ भने १ करोड ८७ लाख ९९ हजार ८८५ रुपैयाँ जरिवाना तोकिएको छ । चालू आर्थिक वर्षको पहिलो ११ दिनमै १९ जना फरार अभियुक्तहरू(१२ पुरुष, ७ महिला) पक्राउ परेका छन् । उनीहरुलाई ७ वर्ष ४ महिना ३ दिन कैद र ८ लाख ११ हजार ७३० रुपैयाँ जरिवाना तोकिएको छ ।

पछिल्लो वर्ष २७९ वटा मुद्दा दर्ता भएका थिए, जसमा १४९ जना पक्राउ समेत परिसकेका छन् । यस्तै, पछिल्लो वर्ष आत्महत्यासम्बन्धी ५३ मुद्दा दर्ता भएकोमा पुतलीबजार नगरपालिकामा सबैभन्दा धेरै १२ वटा रहेका छन् । अन्य गम्भीर मुद्दाहरूमा ज्यान सम्बन्धी ४७, जबरजस्ती करणी १५, लागू औषध १४, र फुटकर ज्यान १९ रहेका छन् ।

आत्महत्याका घटनामा अघिल्ला वर्षको तुलनामा क्रमिक गिरावट देखिएको र यसको रोकथामका लागि समुदायमास्तरमै तनाव व्यवस्थापन तालिम तथा सचेतनामूलक कार्यक्रम चलाइएको प्रहरीको भनाइ छ ।

यस्तै, बर्षातको समयमा अवैध रूपमा नदीजन्य पदार्थ उत्खनन गर्ने २५ वटा सवारीसाधनलाई नियन्त्रणमा लिई ३ लाख ६० हजार राजस्व संकलन गरिएको थियो । काठ तस्करीसम्बन्धी मुद्दामा १६८.६३ क्यूफिट काठ नियन्त्रणमा लिइएको छ भने ५३ लाखभन्दा बढी मूल्यका अवैध लत्ताकपडा, खाद्य तथा कस्मेटिक वस्तुहरु नियन्त्रणमा लिइएका छन् ।

गाँजा फडानी अभियान अन्तर्गत गत आर्थिक वर्षमा १०२ रोपनी क्षेत्रफलमा २१,५५३ गाँजाका बोट नष्ट गरिए भने चालू आवमा ५५ रोपनीमा १२,६१६ बोट नष्ट गरिएका छन् । अवैध लागू औषधसहित १८ जना पक्राउ परेका छन् जसबाट ठूलो मात्रामा डाइजेपाम, फेनेरेगन, नुफिन एम्पुल र नाइट्राभेट ट्याबलेट बरामद गरिएको छ ।

गत आर्थिक वर्षमा ट्राफिक चेकजाँचका क्रममा १९,२६० सवारीसाधनलाई कारवाही गरी १ करोड ४१ लाख राजस्व संकलन गरिएको छ । चालू आवमा ३१० सवारीसाधनबाट २ लाख २४ हजार राजस्व संकलन गरिएको छ ।

गत वर्ष समुदाय-प्रहरी साझेदारी कार्यक्रम अन्तर्गत २,२९७ वटा कार्यक्रमबाट ६२,६३५ नागरिक लाभान्वित भएका छन् भने चालू आवमा ९८ कार्यक्रममा १,४२१ जना सहभागी भएका छन् । प्रहरीको गस्ती, हराएका व्यक्तिको खोजी, घरेलु मदिरा नियन्त्रण, जडिबुटी संकलन नियन्त्रण र मोबाइल तथा अन्य हराएका सामान फेला पार्ने कार्यमा समेत प्रहरीको सक्रियता देखिएको छ ।

स्याङ्जा प्रहरी प्रमुख एसपी न्यौपानेले फरार अभियुक्त पक्राउ, लागू औषध नियन्त्रण, अवैध उत्खननमा कारबाहीलगायतका कामलाई उच्च प्राथमिकतामा राखेको बताए । कार्यक्रममा एसपी न्यौपानेले समाजमा शान्ति, सुरक्षा र सामाजिक सद्भाव कायम गर्न प्रहरी, पत्रकार, र समुदायबीच सहकार्य अपरिहार्य रहेको उल्लेख गरे ।

उक्त कार्यक्रममा प्रहरी नायब उपरीक्षक प्रशन्नराज चौधरी, पत्रकार महासंघ स्याङ्जाका अध्यक्ष प्रदीप कोइराला, पूर्व अध्यक्षहरू ओमप्रकाश शर्मा र श्रीकृष्ण सिग्देलसहित जिल्लाका क्रियाशील पत्रकारहरूको सहभागिता रहेको थियो ।