स्याङ्जाको फेदीखोला गाउँपालिकाले ‘स्थानीय अन्नको संरक्षण र प्रवर्द्धन’ मा नयाँ इतिहास रच्दै विद्यालयमा हप्तामा कम्तीमा दुई दिन कोदोबाट बनेका परिकार अनिवार्य गर्ने निर्णय गरेको छ ।

गाउँपालिकाको यो निर्णय प्रथम राष्ट्रिय कोदो दिवस २०८२ साउन १६ गतेबाट लागुहुने छ ।

अबदेखि विद्यालयका दिवा खाजामा ढिँडो, कोदो मम, तावा रोटी, पुवा, सेलरोटी, चिउरा, हलुवा, सूपजस्ता कोदोबाट निर्मित स्वादिला र पौष्टिक परिकारहरू अनिवार्य रूपमा समावेश गरिनेछ ।

गाउँपालिका अध्यक्ष घनश्याम सुवेदीले भने, “विद्यालयदेखि सभा–सेमिनारसम्म अब कोदोका परिकारलाई प्राथमिकता दिनेछौं।” वडा कार्यालय, चमेना गृहदेखि सार्वजनिक कार्यक्रमहरूमा समेत कोदोका परिकार अनिवार्य बनाउने नीति लिइएको उनले जानकारी दिए ।

कोदोको पोषण मूल्य, खाद्य सुरक्षामा योगदान, कृषकको आम्दानी वृद्धि, र स्थानीय अर्थतन्त्र सुदृढीकरण जस्ता बहुआयामिक लाभलाई केन्द्रमा राख्दै पालिकाले नीति निर्माण गरिरहेको छ ।

कोदो दिवसको अवसरमा विशेष कार्यक्रम
साउन १६ गते ‘कोदो दिवस’ को अवसरमा फेदीखोला–१, रामकोटमा कोदो रोपाइँ, परिकार प्रदर्शनी, प्रयोगात्मक कार्यक्रममार्फत समुदायस्तरमा चेतना अभिवृद्धि गरिने अध्यक्ष सुवेदीले बताए ।

विद्यालयस्तरमै सचेतना फैलाउन पालिकाले २०७७ सालदेखि कक्षा ६ को स्थानीय पाठ्यक्रम ‘हाम्रो फेदीखोला’ मा ‘कोदोः बहुपयोगी खाद्यान्न’ विषय समावेश गरिसकेको छ ।

फेदीखोलाको यो कदम केवल कोदोको प्रवर्द्धन मात्र नभई स्थानीयपन, स्वास्थ्य र आत्मनिर्भरता को गहिरो सन्देश हो । यसले अन्य पालिकाहरूका लागि पनि प्रेरणा बन्ने पूर्ण सम्भावना बोकेको छ ।