राष्ट्रिय स्वतन्त्र पार्टी (रास्वपा)ले पोखराका युवा उद्यमी अशोक खड्कालाई अभियान तथा प्रचारप्रसार विभागको सदस्यमा मनोनीत गरेको छ ।

पार्टीका महामन्त्री कविन्द्र बुर्लाकोटीले खड्कालाई बुधबार विभाग सदस्यमा मनोनीत गरेका हुन् । विभाग प्रमुख मनिष झाको सिफारिसमा खड्काको मनोनयन गरिएको हो । खड्कालाई मनोनयन गर्न विभागले मंगलबार महामन्त्री बुर्लाकोटीसमक्ष सिफारिस गरेको थियो ।

पोखरा –७ राधाकृष्ण मार्गका स्थायी बासिन्दा खड्का ‘पिउरो’ ब्राण्डअन्तर्गतको मिनरल वाटर उत्पादन गर्ने कम्पनीका निर्देशक हुन् । उनी पोखरामा पानी उद्योगमार्फत उद्यमशीलता विकासमा सक्रिय छन् । युवा व्यवसायीको साझा संस्था ‘युवा उद्यमी मञ्च’मा समेत उनको सक्रियता रहेको छ ।

युवा उद्यमीको पहिचान बनाएका खड्काको पार्टीको प्रचार विभागमा भएको मनोनयनलाई व्यवसायिक पृष्ठभूमिका व्यक्तित्वलाई पार्टी संरचनामा स्थान दिने प्रयासका रूपमा हेरिएको छ ।