धादिङको बेनीघाट रोराङ गाउँपालिका-१० जवाङखोलामा सुक्खा पहिरो खस्दा अवरूद्ध बनेको पृथ्वी राजमार्ग सञ्चालनमा आएको छ ।

राति १ बजे गएको पहिरो पन्छाएर दिउँसो ३ बजेदेखि राजमार्गमा दुईतर्फी नै यातायात खुलाइएको जिल्ला प्रहरी कार्यालय धादिङका डीएसपी सुवास हमालले जानकारी दिए ।

बिहान एक पटक पन्छाइएको भए पनि पछि ठूलो पहिरो झरेपछि बाटो फेरि अवरूद्ध बनेको थियो ।  मलेखु-मुग्लिन सडक खण्डको जवाङखोला भन्ने ठाउँमा सडक पूरै ढाकेर ठूलो पहिरो खसेको थियो ।

चितवनको इच्छाकामना गाउँपालिकाको तुइन खोलामा पहिरो खस्दा शुक्रबार र शनिबार दुई दिन सवारी सञ्चालन पूर्णरुपमा रोकिएका थिए। त्यो पहिरो पन्छाएर सोमबार दिउँसोदेखि तुइन खोलामा दुईतर्फी नै सवारी सञ्चालन हुन थालेकामा फेरि रोकिएको छ ।

पटकपटक पहिरो खस्दा दसैँको बेला यात्रुले सास्ती पाएका छन्। यात्रामा जोखिम पनि बढेकाले सुरक्षित ढंगले यात्रा गर्न पनि प्रहरीले अनुरोध गरेको छ।

जिल्ला प्रशासन कार्यालय धादिङले जवाङखोलाको पहिरो पन्छाउन समय लाग्ने भन्दै बैकल्पिक सडक प्रयोग गरेर यात्रा गर्न यात्रुहरुलाई आग्रह गरेको छ।