काठमाडौं । बागमती प्रदेश प्रमुख दीपक प्रसाद देवकोटाले भोटेकोशी बाढी प्रभावित नागरिकको राहत तथा पुनर्स्थापनाका लागि आफ्नो एक महिनाको पारिश्रमिक प्रधानमन्त्री दैवी प्रकोप राहत कोषमा जम्मा गरेका छन् ।

प्रदेश प्रमुख देवकोटाले २०८३ भदौ महिनामा आफूले प्राप्त गर्ने मासिक सुविधा दुई किस्तामा राहत कोषमा हस्तान्तरण गरेका हुन् । उनले पहिलो किस्ता भदौ १६ गते र दोस्रो किस्ता भदौ ३१ गते जम्मा गरेका हुन् ।

प्राकृतिक विपत्तिका कारण भोटेकोशी क्षेत्रका नागरिकले ठूलो जनधनको क्षति व्यहोर्नुपरेको अवस्थामा प्रभावित परिवारको राहत र पुनर्स्थापनामा आफ्नो तर्फबाट समेत योगदान पुगोस् भन्ने उद्देश्यले एक महिनाको सुविधा प्रदान गरेको प्रदेश प्रमुख देवकोटाले बताए ।

बाढीबाट प्रभावित नागरिकको अवस्था बुझ्न प्रदेश प्रमुख देवकोटा स्वयं भदौ १३ गते नुवाकोटको विदुरस्थित त्रिशूली नदी क्षेत्रमा पुगेका थिए । स्थलगत रूपमा प्रभावित क्षेत्रको अवस्था अवलोकन गर्दै उनले विपत्तिबाट प्रभावित नागरिकको पीडा र आवश्यकताबारे जानकारी लिएका थिए ।

भोटेकोशी क्षेत्रमा आएको बाढी तथा पहिरोले ठूलो क्षति पुर्‍याएपछि प्रभावित नागरिकको उद्धार, राहत तथा पुनर्स्थापनाका लागि विभिन्न तह र क्षेत्रबाट सहयोग जुटिरहेको छ। प्रदेश प्रमुख देवकोटाको यो सहयोग पनि विपत्तिमा परेका नागरिकलाई राहत पुर्‍याउने प्रयासकै एक हिस्सा हो।

प्रदेश प्रमुख देवकोटाले बाढी तथा पहिरो प्रभावित क्षेत्रमा उद्धार र राहतका कार्यलाई थप तीव्र बनाउन सम्बन्धित सरोकारवाला निकायलाई आग्रह गरे ।

उनले विपत्तिको यस कठिन समयमा प्रभावित नागरिकलाई एक्लो महसुस हुन नदिन सबै नागरिक, संघसंस्था तथा सरकारी तथा गैरसरकारी निकायलाई आ–आफ्नो क्षेत्रबाट सहयोग गर्नसमेत अपिल गरेका छन् ।

“संकटको यस घडीमा सबै एकजुट भएर प्रभावित नागरिकको साथमा उभिन आवश्यक छ,” भन्ने भावनासहित प्रदेश प्रमुख देवकोटाले राहत तथा पुनर्स्थापनाका कार्यमा सहयोग र सहकार्यका लागि आग्रह गरेका हुन् ।