जापानको चिवामा बस्ने बादल छन्त्यालको प्रेमिकाको छुरा प्रहारबाट हत्या भएको छ । छन्त्याल परिवारको पुरानो घर म्याग्दी, बेनी भएपनि हाल पोखरामा बसोबास रहेको छ ।

चिवा प्रिफेक्चरस्थित फुनाबासी सिटीमा २१ वर्षका छन्त्यालको हत्या उनको जापानी प्रेमिकाले गरेकी हुन्। करिब ३० वर्ष उमेर समूहकी ती जापानी युवती र छन्त्यालबीच विगत एक वर्षदेखि प्रेम सम्बन्ध रहेको बताइएको छ।

सम्बन्धमा खटपट आएपछि दुवैले अलग हुने निर्णय गरेका थिए। अन्तिम पटक भेट गर्नका लागि छन्त्याल आफ्नी प्रेमिकासँग नियमित गइरहने होटलमा पुगेका थिए।

उक्त होटलमा उनीहरू हरेक आइतवार भेट्ने गरेको बताइन्छ।

प्रहरीले दिएको विवरणअनुसार आइतवार बिहान करिब ३ बजेसम्म छन्त्याल आफ्ना साथीहरूसँग सम्पर्कमा थिए। तर बेलुका करिब ५ बजे उनका दाजु तेजेन छन्त्यालले भाइको मृत अवस्थाको खबर पाएका थिए।

जापानी प्रहरीले छन्त्यालको शरीरमा दुई वा बढी पटक चक्कु प्रहार गरिएको पुष्टि गरेको छ।

छन्त्यालको शवको पोस्टमार्टम यही असोज २३ गते (अक्टोबर ८ तारिख) गरिने बताइएको छ। घटनाको विस्तृत अनुसन्धान जारी रहेको जापानी प्रहरीले जनाएको छ।