नेकपा माओवादी केन्द्र र नेकपा एकीकृत समाजवादीबीचको एकता प्रक्रिया सकारात्मक रूपमा अघि बढेको छ ।

माओवादी र समाजवादीबीच एकताको गृहकार्य सकारात्मक रूपमा अगाडि बढेको र छिट्टै एकता हुने एसका उपाध्यक्ष तथा पार्टी प्रवक्ता प्रकाश ज्वालाको दाबी छ । उनका अनुसार सैद्धान्तिक कुराहरू सबै मिलिसकेको छ । संगठनात्मक कुराहरूका बारेमा छलफल जारी छ । बहुपदमा जाने कि नजाने । संयोजक सहसंयोजक बनाएर जानेकि भन्ने बारेमा छलफल भइरहेको छ । सबै कुरा मिलेपछि एकता हुन्छ ।

एसका सम्मानित नेता झलनाथ खनाल पनि सकारात्मक भएपको नेताहरू बताउँछन् । सम्मानित नेता खनाल र महासचिव घनश्याम भुसाल पार्टी एकताको विपक्षमा नभएर सम्मानजनक र सबै कुरा टुङ्ग्याएर एकता गरौँ भन्ने पक्षमा रहेको बताइन्छ ।

एकता हुँदा मार्क्सवाद र लेनिनवाद मात्र मान्ने गरी सहमति भएको ज्वालाले बताए । माओवादीले मान्दै आएको माओवाद र एसले मान्दै आएको जनताको बहुदलीय जनवाद एकतापछि भने छोड्ने र नेपाली विशेषता अनुसारको समाजवाद मान्ने सहमति भएको नेताहरू बताउँछन् ।

एकतापछि नेकपा राख्ने कि भन्नेमा छलफल भएको ज्वाला बताउँछन् । उनले भने, ‘नेकपा राख्ने कि भन्ने भएको छ । तर अरु नामका बारेमा पनि छलफल जारी रहेको छ । नेकपा समाजवादी, नेपाली कम्युनिस्ट पार्टी आदि । चुनाव चिह्नका बारेमा पनि छलफल भइरहेको छ ।’

जेन–जी प्रर्दशनपछि राजनीति बढी ध्रुवीकरण भइरहेको छ । भदौमा बनेको अन्तरिम सरकारले आउँदो फागुन २१ गते निर्वाचनको मिति घोषणा गरेको छ । उक्त निर्वाचनको लागि कार्तिक मसान्तसम्म निर्वाचन आयोगमा दल दर्ता गरिसक्नु पर्नेछ । निर्वाचन आयोगमा दल दर्ता गर्नुभन्दा पहिला नै माओवादी केन्द्र र एकीकृत समाजवादीबीच एकता हुने तयारी छ ।