पोखरा । म्यानपावर कम्पनी एमिटी ग्लोबल इम्प्लोइमेन्ट सर्भिसेस् प्रालिको पोखरा शाखा कार्यालयमा समाचार संकलनका लागि पुगेका चार पत्रकारमाथि सञ्चालकले अभद्र व्यवहार गरेका छन् । कास्कीका पत्रकारहरू विजय नेपाली, सुरेश सुनार, अर्जुन हिताङ र विष्णु बिकमाथि दुर्व्यवहार भएको हो ।

विदेशमा रोजगारीको सम्झौता अनुसारको काम तथा पारिश्रमिक नपाएको पीडित पक्षले पत्रकार सामु गुनासो गरेपछि पत्रकारहरू कम्पनी पक्षको प्रतिक्रिया लिन मंसिर १ गते पोखरा ८, सभागृह नजिकै रहेको कार्यालय पुगेका थिए ।

त्यसक्रममा ब्राञ्च डाइरेक्टर दिनेश मगरले २०/२५ जनाको समूहका मानिसहरू बोलाई घेरा हालेर बाहिर निस्कन नदिइकन डर, धाकधम्की, गालीगलौज, अपशब्द प्रयोग गरी अभद्र व्यवहार गरेको पत्रकारहरुले बताएका छन् । ‘हामी सञ्चारकर्मीले खिचेको भिडियो डिलिट गर्न लगाई अन्दाजी २ घण्टासम्म मेनपावरभित्र राखी बाहिर निस्कन नदिई हातपातको प्रयाससमेत गरी अभद्र व्यवहार गरे’ पत्रकारहरुले भनेका छन् ।

उनीहरुले शुक्रबार जिल्ला प्रहरी कार्यालय कास्कीमा मगर विरूद्ध उजुरी दर्ता गराएका छन् ।  जिल्ला प्रहरी कार्यालय कास्कीले दुवै पक्षलाई छलफलका लागि आइतबार कार्यालयमा उपस्थित हुन भनेको छ ।

यसैबीच, समाचार संकलनको क्रममा पत्रकारहरूमाथि गरिएको दुर्व्यवहारको घटनाप्रति पत्रकारका विभिन्न संघ संगठनहरुले आपत्ति जनाउँदै दोषी उपर कडा कारबाही गर्न माग गरेका छन् ।

नेपाल प्रेस युनियन कास्की, प्रेस चौतारी नेपाल कास्की, प्रेस सेन्टर नेपाल कास्की, खेलकुद पत्रकार मञ्च गण्डकीले विज्ञप्ति जारी गर्दै मेनपावर सञ्चालकको यस्तो कार्य प्रेस स्वतन्त्रता, पत्रकारिताको मर्यादा र कानूनी व्यवस्थामाथिको खुला चुनौती भएको बताएको छ ।

समाचार सन्तुलित बनाउन आरोपित पक्षको भनाई लिन पुगेका पत्रकारमाथि फोटो–भिडियो डिलिट गराउने, थुनेर राख्ने तथा गलत कामको साक्षी बस्न बाध्य पार्ने जस्ता गतिविधिको घोर निन्दा र भत्र्सना गरिएको संस्थाहरुले उल्लेख गरेका छन् ।

संवाद र कानूनी प्रक्रियाबाट विषय समाधान गर्ने विकल्प हुँदाहुँदै पत्रकारमाथि गरिएको अमानवीय व्यवहारको छानविन गरी दोषीलाई कानूनी दायरामा ल्याउन उनीहरुले जोडदार माग गरेका छन् । समाजका विकृति–विसंगति उजागर गर्न, समस्यामा परेका नागरिकको आवाज मुखरित गर्न पत्रकारिताको भूमिका महत्वपूर्ण रहेको भन्दै पत्रकारमाथि हुने यस्ता दुव्यवहार नगर्न नगराउन चेतावनी समेत दिइएको छ ।