पोखरा । नेसनल प्याब्सन, कास्की आयोजनामा पोखरामा हुने दोस्रो बृहत् बालप्रतिभा पहिचान महोत्सव तथा खेलकुद प्रतियोगिता–२०८२ तयारी पूरा भएको छ । यी दुई इभेन्ट पोखरा प्रदर्शनी केन्द्र र पोखरा रंगशालामा छुट्टाछुट्टै समयमा हुँदैछन्।

संस्थाका अध्यक्ष हेमन्त अधिकारीका अनुसार यही २० देखि २३ मंसिरसम्म पोखरा रंगशालामा खेलकुद प्रतियोगिता हुनेछ । यसैगरी, बालप्रतिभा पहिचान कार्यक्रम २४ देखि २६ मंसिरसम्म पोखरा प्रदर्शनी केन्द्रमा हुनेछ । औपचारिक उद्घाटन २४ गते नै हुनेछ।

एन प्याब्सन कास्कीमा आवद्ध ४३ विद्यालयका १५ सय विद्यार्थीले विभिन्न विधामा प्रतिस्पर्धा गर्ने छन् । विजेता विद्यालय तथा विद्यार्थीलाई पुरस्कारस्वरुप ट्रफी, मेडल प्रदान गरिनेछ।

महोत्सवमा कास्कीसहित छिमेकी जिल्लाका निजी तथा सामुदायिक विद्यालयका विद्यार्थी तथा तिनका अभिभावकले समेत अवलोकन गर्न आउने जनाइएको छ । ‘यो महोत्सव विद्यार्थीको अन्तरनिहित प्रतिभा प्रस्फुटन मात्र नभई, सिकाइको थलो पनि हुने हामीले विश्वास लिएका छौं,’ उनले भने ।

बालप्रतिभा पहिचानअन्तर्गत सामूहिक लोकनृत्य, एकल गायन, चित्रकला, कविता वाचन, अभिनय, विज्ञान तथा प्रविधि, हस्तकलाअन्तर्गत पात, पराल र चोयाबाट निर्मित सामग्री र अंग्रेजी वक्तृत्वकला हुने एन प्याब्सन कास्कीका अतिरिक्त क्रियाकलाप प्रमुख राजु कायस्थले जानकारी दिए ।

अंग्रेजी वक्तृत्वकलामा कक्षा ९ देखि १२ सम्मका विद्यार्थीले सहभागिता जनाउने छन् भने अन्य प्रतियोगितामा कक्षा १ देखि १० सम्मकै विद्यार्थीले भाग लिने प्याव्सन कास्कीका सचिव प्रेमराज अधिकारीले जानकारी दिए ।

त्यसैगरी, खेलकुदतर्फ छात्र क्रिकेट प्रतियोगिता र छात्र फुटसल प्रतियोगिता हुनेछ । क्रिकेटतर्फ कक्षा १ देखि १० सम्मका र फुटसलमा कक्षा ११ र १२ का विद्यार्थीले मात्र भाग लिने कोषाध्यक्ष राजु केसीले बताए ।

२० मंसिरमा सुरु हुने क्रिकेट प्रतियोगिता उद्घाटनमा अल्फा एकेडेमी र सिद्धार्थ लवडेल तथा फुटसलमा नेशनल क्रियशन र न्यू ग्यालेक्सीबीच प्रतिस्पर्धा हुनेछ ।

प्रतियोगिता सम्पन्न गर्न विभिन्न उपसमिति गठन गरिएको छ । सामूहिक लोकनृत्य प्रतियोगिता संयोजकमा शिवराज पौडल तथा सदस्यमा पितृराज अधिकारी र विक्रम सुवेदी छन् । एकल गायन प्रतियोगिता संयोजकमा अर्जुनप्रसाद अधिकारी तथा सदस्य हेम रानाभाट, रुद्रप्रसाद अधिकारी, सल्लाहकार तिलकप्रसाद अधिकारी छन् ।

यसैगरी, चित्रकला संयोजकमा विष्णुप्रसाद पौडेल तथा सदस्यमा मित्र राई र सुरेशराज पाण्डे छन् । कविता वाचनमा हरिराज अधिकारी संयोजक तथा विक्रम सुवेदी र भुवन पौडेल सदस्य छन् । अभिनय संयोजकमा विक्रम सुवदी तथा सदस्य दीपु भारी र अशोक शर्मा छन् । विज्ञान तथा प्रविधि प्रतियोगिता संयोजक तोलाकान्त न्यौपाने तथा सदस्य अजय थापा र शालिग्राम पराजुली, हस्तकला प्रतियोगिता संयोजकमा रमेशराज पौडेल तथा सदस्य गगन गुरुङ र सोमनाथ पौडेल छन् ।

वक्तृत्वकलाको संयोजकमा हेम रानाभाट तथा सदस्य हरि धमला र मित्र राई, क्रिकेट संयोजकमा ज्ञानेन्द्रबहादुर थापा तथा सदस्य हिमाल गुरुङ र देवराज कार्की, फुटसल संयोजकमा अर्जुनप्रसाद पाण्डे तथा सदस्य ज्ञानेन्द्रबहादुर थापा, हिमाल थापा र सल्लाहकार केशवशरण पौडेल छन् ।