पोखरा । गण्डकी प्रदेशका प्रमुख डिल्लीराज भट्टले इसाई धर्मावलम्बीहरूको महान् पर्व ‘क्रिसमस डे’को अवसरमा शुभकामना व्यक्त गरेका छन् ।

आज एक शुभकामना सन्देश जारी गर्दै प्रदेश प्रमुख भट्टले विश्वभरका इसाई धर्मका अनुयायीहरूले ‘क्रिसमस डे’ धार्मिक सांस्कृतिक उत्सवका रूपमा मनाउने उल्लेख गर्दै क्रिसमस धार्मिक पर्व मात्र नभई सम्पूर्ण मानव समाजका लागि सहिष्णुता र परोपकारको सन्देश बोकेको पर्व पनि रहेको उल्लेख गरेका छन् ।

‘पर्वहरुले हामीलाई प्रेम र भाइचारा प्रवर्द्धन गर्न सिकाउँछ । हाम्रा पर्वले सबै धर्मावलम्बीलाई एकतामा बाँध्ने सेतुको काम गरेको छ । विविध सांस्कृतिक पहिचान बोकेका समुदायबीच आपसी सद्भाव, सहिष्णुता र ऐक्यवद्धताको भावना अभिवृद्धि गर्दै राष्ट्रिय एकतालाई थप सुदृढ बनाउन महत्वपूर्ण भूमिका खेल्ने मैले विश्वास लिएको छु ।’ शुभकामना सन्देशमा उल्लेख छ ।

इसाई धर्मावलम्बीहरूको यस पर्वले सबै नेपालीहरूबीच शान्ति, प्रेम, आपसी एकता र विश्वासको भावनालाई थप गाढा बनाउन प्रेरणा प्रदान गरोस् भन्ने शुभकामना पनि उनले व्यक्त गरेका छन् ।