समयमै सकिनुपर्ने काम एक वर्ष ढिलाइ भएपछि घुम्ती–चिसापानी सडकको कालोपत्रेले पछिल्लो समय तीव्रता पाएको छ । काउले–सालडाँडा खण्डअन्तर्गत करिब आठ किलोमिटर सडक कालोपत्रे गर्ने काम अहिले सक्रिय रूपमा अघि बढिरहेको छ ।

करिब २५ वर्षअघि ट्रयाक खुलेको यस सडकको दोस्रो खण्ड पहिलोपटक कालोपत्रे हुन लागेको हो । २०७९ असार १९ गते सम्झौता गरेर निर्माण कम्पनीले काम थालेको थियो । २७ महिनाभित्र सक्ने गरी टुन्डी आरएस जेभी निर्माण कम्पनीले २१ करोड ५१ लाख ४८ हजार ७०४ रुपैयाँमा ठेक्का लिएको थियो । सम्झौताअनुसार २०८१ असोज २० गतेसम्म काम सक्नुपर्ने भए पनि ढिलाइ भएको थियो । चालू आर्थिक वर्ष २०८२/८३ को भदौदेखि भने कालोपत्रेले गति लिएको हो ।

सडक फराकिलो बनाउने, समथर पार्ने, टेवा पर्खाल र नाला निर्माण तथा गिटी बिछ्याउने काम सम्पन्न भइसकेको सडक डिभिजन कार्यालयले जनाएको छ । चालू आवको अन्त्यसम्ममा सम्झौताअनुसार सबै काम सकिने र अब बजेट अभावका कारण कालोपत्रे नरोकिने कार्यालयले जनाएको छ ।

२७ किलोमिटर लामो यस सडकको पहिलो खण्ड घुम्ती–काउले खण्डको ५.५ किलोमिटर सडक भने आव २०७७/७८ मा पूर्वाधार विकास कार्यालयले करिब १६ करोड रुपैयाँ खर्चेर कालोपत्रे गरेको थियो । नयाँ ट्रयाक आव २०५७/५८ मै खुले पनि पहिलो खण्ड नै कालोपत्रे हुन करिब २० वर्ष लागेको थियो ।

यस सडकले पुतलीबजार नगरपालिका र आसपासका पुरानो बहाकोट, कोल्मा, ओरस्टे, किचनास, मग्याम चिसापानी र चित्रेभन्ज्याङ क्षेत्रका बासिन्दालाई सडक सञ्जालसँग जोडेको छ । सडक पूरा भएपछि पुतलीबजार नगरपालिका–१, २, ८ र ९, बिरुवा गाउँपालिका–३, ४ र ५ तथा हरिनास गाउँपालिका–१, २, ३ र ४ सहित तनहुँको पश्चिमी क्षेत्र शुक्लागण्डकी, ढोरफिर्दी र राईपुरका स्थानीय प्रत्यक्ष लाभान्वित हुनेछन् ।

सडक उपभोक्ता समितिका पूर्वअध्यक्ष चन्द्रकान्त पोख्रेलका अनुसार नयाँ ट्रयाक खोल्ने बेला स्थानीयबीच तानातान भएको र ट्रयाक खुलेपछि पनि बजेट अभावका कारण समयमै सडक स्तरोन्नति हुन सकेको थिएन । अहिले भने लामो प्रतीक्षापछि सडक कालोपत्रेले गति लिँदा स्थानीयमा आशा बढेको छ ।