स्याङ्जामा आर्थिक गतिविधिको वास्तविक तस्वीर उतार्न जिल्ला आर्थिक गणना कार्यालय स्थापना गरिएको छ । पुतलीबजार नगरपालिका–१ स्थित वीपी चोक नजिकै सञ्चालनमा आएको कार्यालयले जिल्लाभरका उद्योग, व्यवसाय तथा विभिन्न प्रतिष्ठानका तथ्यांक संकलन गर्नेछ ।

नयाँ कार्यालयबाट आर्थिक क्रियाकलापसँग सम्बन्धित आधारभूत विवरण संकलन, प्रशोधन र विश्लेषण गरी सार्वजनिक गर्ने काम अघि बढाइएको जनाइएको छ । यसले जिल्लाको समग्र आर्थिक अवस्थाबारे स्पष्ट चित्र दिन सहयोग पुग्ने अपेक्षा गरिएको छ ।

कार्यालय उद्घाटन गर्दै सहायक प्रमुख जिल्ला अधिकारी प्रेमप्रसाद सुवेदीले विकासका हरेक योजना तयार गर्न विश्वसनीय आर्थिक तथ्यांक अपरिहार्य हुने बताए । “यस्ता गणनाले मुलुकको आर्थिक आधार बलियो बनाउँछ,” उनले भने, “अब जिल्लाको यथार्थ आर्थिक अवस्था तथ्यांकमार्फत स्पष्ट देखिनेछ ।”

आर्थिक गणनामा उद्योग, व्यापार, सेवा क्षेत्रदेखि विभिन्न संघसंस्था र प्रतिष्ठानका गतिविधि समेटिनेछ । यसमार्फत जिल्लामा कति आर्थिक इकाइ सक्रिय छन्, तिनको स्वरूप कस्तो छ भन्ने विवरण तयार गरिनेछ ।

सहायक आर्थिक गणना अधिकारी रामचन्द्र वाग्लेले आर्थिक गणनाले राष्ट्रिय स्तरका तथ्यांक तयार गर्न महत्वपूर्ण आधार दिने बताए । उनका अनुसार यसले कुल गार्हस्थ उत्पादन, क्षेत्रगत आर्थिक संरचना तथा भविष्यका सर्वेक्षणका लागि नमुना ढाँचा तयार गर्न सहयोग पुर्‍याउनेछ ।

स्वास्थ्य अधिकृत विनोद भट्टले पनि आर्थिक गणना नीति निर्माण र योजनाका लागि महत्वपूर्ण हुने उल्लेख गरे । उनले तथ्यांकमा आधारित निर्णय प्रक्रियाले विकासलाई प्रभावकारी बनाउने बताए ।

नेपालमा दोस्रोपटक सञ्चालन भइरहेको आर्थिक गणना तीन चरणमा पूरा गरिनेछ । यसअघि २०७५ सालमा पहिलो राष्ट्रिय आर्थिक गणना गरिएको थियो । प्रत्येक पाँच वर्षमा यस्तो गणना गर्ने नीति अनुसार अहिलेको कार्यक्रम अघि बढाइएको हो ।

जिल्लामा स्थापना भएको यो कार्यालयले आगामी दिनमा स्थानीय तहदेखि केन्द्रसम्मका नीति निर्माणमा उपयोगी तथ्यांक उपलब्ध गराउने विश्वास लिइएको छ ।