पोखरामा पहिलोपटक आयोजना गरिएको पोखरा फ्लेयर मास्टर च्यम्पियनसिपको उपाधि इटहरीका राई बादशाह किराँतले जितेका छन् ।

उनले अन्य ३६ जना प्रतिस्पर्धीलाई उछिन्दै उपाधि जिते । कार्यक्रम कान्तिपुर होटेल ट्रेनिङ सेन्टर पोखराको आयोजना, कान्तिपुर टुरिजम एन्ड होटेल म्यानेजमेन्ट कलेज पोखराको सहकार्य एवं सेतो बाघको प्रस्तुतिमा भएको हो ।

नेपाली बार टेन्डरलाई उजागर गर्दै व्यावसायिक तालिमलाई विश्वव्यापी रोजगारीको बाटोका रूपमा स्थापित गर्ने उद्देश्यसमेत रहेको यो राष्ट्रियस्तरको च्याम्पियनसिप हो ।

यसमा बुटवलका रोशन चौधरी उपविजेता, काठमाडौंका नवीन धामी तेस्रो, बुटवलका रेशम गुरुङले चौथो स्थान हात पारे । यसैगरी, इटहरीका उनै राई कक्टेलल बनाउने र काठमाडौंका विनोद गुरुङ उत्कृष्ट बोटल घुमाउने कलामा उत्कृष्ट भए ।

विजेताले ४० हजार नगद, बार टुल सेटसँगै प्याराग्लाइडिङको टिकटलगायत पुरस्कार पाएका छन् ।

त्यस्तै, उपविजेताले २५ हजार नगदसँगै बार सामग्री, तेस्रोले १५ हजार नगद र बार सामग्री, चौथोले सात हजारसँगै बार सामग्री प्राप्त गरेका छन् । साथै, उत्कृष्ट कक्टेलले पाँच हजार नगद र बन्जी जम्पको टिकट, उत्कृष्ट बोतल घुमाउने कलाले पाँच हजार नगद पुरस्कार पाए । सँगै विजेता सबै ६ जनाले ट्रफी, गिफ्टह्याम्पर, सम्मानपत्र र प्रमाणपत्रसमेत पाए ।

आयोजक कान्तिपुरका संस्थापक अध्यक्ष विजय पौडेलका अनुसार बारटेन्डरले दुईभन्दा बढी पेय पद्धार्थका बोतल घुमाएर नचाएर ग्राहकलाई खुसी बनाउनेसम्बन्धी प्रतियोगिता भएको हो । सहभागी अन्य सबैलाई मायाको चिनो र सहभागिताको प्रमाणपत्र वितरण गरिएको पौडेलले बताए ।

वि.सं. २०६० सालमा स्थापना भएको कान्तिपुर होटल ट्रेनिङ सेन्टरले हालसम्म २८ हजार भन्दा बढीलाई तालिम प्रदान गरिसकेको छ।