पोखरा महानगरपालिकाले फिर्केखोलाको खोलाघरभित्र निर्माण गरिएका स्थायी र अस्थायी सबै संरचना ९ जेठभित्र हटाउन सम्बन्धित व्यक्ति र संस्थालाई अन्तिम चेतावनी दिएको छ ।

तोकिएको समयभित्र संरचना नहटाए महानगरपालिका आफैंले डोजर लगाएर हटाउने र त्यस क्रममा लाग्ने सम्पूर्ण खर्च सम्बन्धित व्यक्ति वा संस्थाबाट सरकारी बाँकी सरह असुल गरिने जनाएको छ ।

महानगरपालिकाले मंगलबार सार्वजनिक सूचना जारी गर्दै वडा नम्बर १८ को अँधेरीकुनादेखि वडा नम्बर २, ४, ५, ७, ८, १७ हुँदै वडा नम्बर ६ को गाईघाटसम्म फैलिएको फिर्केखोलाको खोलाघरभित्र बनेका संरचना हटाउन निर्देशन दिएको हो । फिर्केखोला फेवातालमा मिसिने प्रमुख खोला हो ।

सूचनामा महानगरपालिकाले यसअघि २०८० कात्तिक १० गते ३५ दिने सूचना जारी गरेको उल्लेख गरेको छ । त्यतिबेला महानगरबाट खटिएको प्राविधिक टोलीले स्थलगत नापजाँच गरी खोलाघरको सीमांकन गर्दै पोल गाडेको थियो । महानगरले अहिले ती पोलभित्र पर्ने सबै संरचना हटाउन भनेको हो ।

महानगरपालिकाका अनुसार उक्त सूचनाविरुद्ध उच्च अदालत पोखरामा मुद्दा दायर भएको थियो । अदालतले ‘उत्प्रेषण र परमादेशको आदेश जारी गर्न नपर्ने’ फैसला गरेपछि महानगरले फेरि संरचना हटाउने प्रक्रिया अघि बढाएको हो । महानगरले २०८३ वैशाख ४ गते पनि अर्को सूचना जारी गरेको जनाएको छ ।

‘फिर्केखोलाको खोलाघरभित्र निर्माण भएका स्थायी तथा अस्थायी संरचनाहरू २०८३ जेठ ९ गतेभित्र व्यक्ति वा संस्था स्वयंले हटाउनू,’ सूचनामा भनिएको छ, ‘उल्लेखित मितिभित्र संरचना नहटाएमा महानगरपालिका आफैंले हटाउने र सो क्रममा लाग्ने लागत समेत सम्बन्धित व्यक्ति वा संस्थाबाट सरकारी बाँकी सरह असुलउपर गरिनेछ ।’

फिर्केखोलाको अतिक्रमण, साँघुरो बन्दै गएको बहाव क्षेत्र र वर्षायाममा देखिने डुबान समस्यालाई लिएर महानगरले पछिल्ला वर्षहरूमा निगरानी बढाएको छ । फेवाताल संरक्षणसँग पनि जोडिएको विषय भएकाले खोलाघरभित्रका संरचना हटाउने तयारीलाई महानगरले प्राथमिकतामा राखेको देखिन्छ ।

फिर्केखोला आसपासका क्षेत्रमा पछिल्ला वर्षहरूमा घर, टहरा, पर्खाल तथा अन्य भौतिक संरचना विस्तार हुँदै गएको छ । महानगरले ती संरचनाले प्राकृतिक बहाव अवरुद्ध गरेको र विपद्को जोखिम बढाएको निष्कर्षसहित हटाउने प्रक्रिया अघि बढाएको हो ।

महानगरपालिकाले जारी गरेको सूचनामा संरचना हटाउने निर्णय अदालतबाट समेत वैधानिकता प्राप्त भइसकेकाले अब कार्यान्वयनतर्फ केन्द्रित हुने संकेत गरेको छ ।