संघीय सरकारबाट प्राप्त हुने समानीकरण अनुदानमा करिब दुई करोड रुपैयाँ कटौती भएपछि स्याङ्जाको बिरुवा गाउँपालिकाका दर्जनौँ विकास योजना प्रभावित भएका छन् । बजेट अभावका कारण चालू आर्थिक वर्ष २०८२/८३ मा प्रस्ताव गरिएका २८ वटा योजना कार्यान्वयन हुन नसकेका हुन् ।

गाउँपालिकाले चालू आर्थिक वर्षका लागि २५४ वटा योजना प्रस्ताव गरेको थियो । ती योजनाका लागि पूँजीगततर्फ १३ करोड ४९ लाख रुपैयाँ बजेट विनियोजन गरिएको थियो । तर समानीकरण अनुदानतर्फ प्राप्त हुनुपर्ने ८ करोड ४६ लाख रुपैयाँमध्ये करिब दुई करोड रुपैयाँ कटौती भएपछि सबै योजना अघि बढाउन नसकिएको गाउँपालिकाले जनाएको छ ।

गाउँपालिकाका प्रमुख प्रशासकीय अधिकृत पर्शुराम उपाध्यायका अनुसार बजेट कटौती भए पनि २५४ योजनामध्ये २२६ वटा योजना कार्यान्वयनमा गएका छन् । तीमध्ये हालसम्म १७६ वटा योजना सम्पन्न भइसकेका छन् । उनले उपलब्ध स्रोत र साधनको अधिकतम उपयोग गर्दै अधिकांश योजना सम्पन्न गर्ने प्रयास गरिएको बताए ।

अनुदान कटौतीको प्रत्यक्ष असर सडक पूर्वाधार, पदमार्ग, खानेपानी, सिँचाइ, तटबन्ध, मन्दिर तथा सार्वजनिक शौचालय निर्माणसँग सम्बन्धित योजनामा परेको छ । वडास्तरबाट सिफारिस भई गाउँसभाबाट पारित भएका केही योजना समेत बजेट अभावकै कारण अलपत्र परेका छन् ।

योजना शाखा प्रमुख दीपक ढुङ्गानाका अनुसार अनुदान कटौती नभएको भए गाउँपालिकाले सबै योजना सम्पन्न गर्ने लक्ष्य राखेको थियो । उनका अनुसार हालसम्म विनियोजित पूँजीगत बजेटमध्ये करिब सात करोड रुपैयाँ खर्च भइसकेको छ, जसले झन्डै ५० प्रतिशत वित्तीय प्रगति देखाएको छ ।

यद्यपि बजेट अभावबीच पनि गाउँपालिकाले केही महत्वपूर्ण पूर्वाधार कार्यक्रम सम्पन्न गरेको जनाएको छ । आठवटै वडा कार्यालयलाई सडक सञ्जालसँग जोड्ने रणनीतिक सडक निर्माण कार्यक्रम सम्पन्न भएको गाउँपालिकाको दाबी छ । उक्त कार्यक्रममार्फत ग्रामीण बस्तीलाई सहज पहुँचसँग जोड्दै स्थानीय आर्थिक गतिविधिलाई थप चलायमान बनाउने लक्ष्य राखिएको थियो ।

चालू आर्थिक वर्षमा गाउँपालिकाले सडक स्तरोन्नतिलाई प्राथमिकतामा राखेर बजेट विनियोजन गरेको थियो । यसका साथै जलवायु परिवर्तन न्यूनीकरण, खानेपानी, सिँचाइ, शिक्षा, खेलकुद, तर्ले सामुदायिक स्वास्थ्य भवन, सामुदायिक विद्यालयको क्षमता अभिवृद्धि तथा धर्मशाला निर्माणका कार्यक्रम पनि प्राथमिकतामा परेका थिए ।