सामाजिक कार्यमा सदैव अग्रसर रहँदै आएका सिटिजन फर्निचर एण्ड फर्निसिङ, न्यूरोडका सञ्चालक दिपक कार्कीले रसुवाको भोटेकोशी नदीमा आएको बाढीबाट प्रभावित नागरिकको राहत तथा उद्धारका लागि १ लाख ११ हजार १११ सहयोग गरेका छन्।

युवा उद्यमी कार्कीले उक्त रकम प्रधानमन्त्री दैवी प्रकोप उद्धार कोषमा जम्मा गरेका हुन्। उनले हिमालयन बैंक लिमिटेड, प्रधान कार्यालयमा रहेको ‘PRIME MINISTER DISASTER RELIEF FUND’ को खातामा हस्तान्तरण गरेका हुन्।

बुधबार बिहान रसुवाको भोटेकोशी नदीमा आएको बाढीका कारण रसुवा, नुवाकोट, धादिङ र गोरखालगायत जिल्लाका नदी तटीय क्षेत्र प्रभावित भएका छन्। बाढीबाट ठूलो जनधनको क्षति भएको छ भने प्रभावित क्षेत्रमा उद्धार, खोज तथा राहतका कार्य जारी छ ।

बाढीबाट भएको मानवीय तथा भौतिक क्षतिको विवरण संकलन कार्यसमेत भइरहेको छ। प्रभावित नागरिकलाई तत्काल सुरक्षित स्थानमा व्यवस्थापन गर्नुका साथै दीर्घकालीन रूपमा पुनःस्थापना गर्न आवश्यक रहेको भन्दै प्रधानमन्त्री दैवी प्रकोप उद्धार कोषमा सहयोग गर्न अपिल गरिएको छ।

विपद्को यस कठिन अवस्थामा प्रभावित परिवारको उद्धार, राहत तथा पुनःस्थापना कार्यमा सहयोग पुग्ने उद्देश्यले आफूले सहयोग गरेको कार्कीले बताएका छन् ।