पोखरा नदीपुर स्थित प्रतिभा माविकी छात्रा दीपाली भट्टराई निबन्ध लेखन प्रतियोगितामा प्रथम भएकी छन् ।

हिसान कास्कीले आयोजना गरेको अंग्रेजी तथा नेपाली निबन्ध लेखन प्रतियोगिताअन्तर्गत नेपाली विधातर्फ उनी प्रथम भएका हुन् । दीपाली कक्षा १२ की छात्रा हुन् ।

प्रतियोगितामा करुणानिधि एजुकेसन फाउण्डेसनकी अञ्जना पौडेल दोस्रो, गुरुकुल विद्या सदनकी रेणु परियार तेस्रो तथा माउन्ट अन्नपूर्णकी पूर्णिमा गुरुङ सान्त्वना भए ।

दीपालीले गत वर्ष हिसान कास्कीकै आयोजनामा भएको वक्तृत्वकला प्रतियोगितामा पनि प्रथम स्थान प्राप्त गरेकी थिइन् । वक्तृत्वकलामा नेपाली विधातर्फ दीपाली सर्वोत्कृष्ट भएकी हुन् । यस्तै, अंग्रेजी विधातर्फ पनि प्रतिभाकै महिमा विश्वकर्माले सबैलाई पछि पारेकी थिइन् ।

दीपाली पोखरा पर्स्याङ स्थित शान्ति निकेतन स्कूलकी उत्पादन हुन् । त्यहाँ एसईईसम्म पढेकी उनले उत्कृष्ट नतिजा ल्याएर यहाँका उत्कृष्ट विद्यालय प्रतिभा चयन गरेकी थिइन् ।

• प्रतिभा मावि हिसान कास्कीको वक्तृत्वकलामा दुवै विधामा प्रथम, दिपाली र महिमा सर्वोत्कृष्ट

अंग्रेजीतर्फ मदरल्याण्डका सुयोग प्रथम

अंग्रेजी विधातर्फ मदरल्याण्ड सेकेण्डरी स्कुलका सुयोग अधिकारी निबन्ध लेखन प्रतियोगितामा प्रथम भए ।

एक्स आर्मी पब्लिक सेकेण्डरी स्कुलका अंकित रानाभाट, ग्लोबल कलिजियटकी आकृति पौडेल र स्टेप बाई स्टेपका कमलबहादुर क्षेत्री दोस्रो भए । जुनियर सिटिजन्स एकेडेमीकी सुशानी रानाभाट तेस्रो तथा हिल पोइन्ट सेकेण्डरी स्कुलकी रिसिका बसेल सान्त्वना भइन् ।

१७ औं हिसान स्पोर्टस् मिट–२०८१ अन्तर्गत हिसानले उक्त प्रतियोगिता आयोजना गरेको थियो । विजेतालाई मंगलबार पोखरा रंगशालामा आयोजित १७ औं हिसान स्पोर्टस् मिट उद्घाटनमा पुरस्कृत गरिएको हो ।

गण्डकी प्रदेशका प्रदेश प्रमुख डिल्लीराज भट्टको उपस्थितिमा आयोजित उद्घाटन समारोहमा शिक्षा निर्देशनालय गण्डकीका महानिर्देशक अम्बिकाप्रसाद आचार्य लगायतले पुरस्कृत गरेका हुन् ।

६१ शिक्षण संस्थाले भाग लिएको हिसान स्पोर्टस् मिट ३ दिनसम्म चल्नेछ ।