पोखरा पालिखेचोकस्थित प्रतिभा माध्यमिक विद्यालयका विद्यार्थीलाई नेतृत्व विकास तालिम प्रदान गरिएको छ ।

विद्यालयका कक्षा ११ र १२ मा अध्ययनरत १६० जना विद्यार्थी प्रतिनिधिहरूलाई एक दिने नेतृत्व विकास तालिम प्रदान गरिएको विद्यालयले जनाएको छ ।

कार्यक्रममा सहजीकरण गर्दै जीवनशैली विज्ञ एवं विश्व प्रेरणा शिक्षक रमण भट्टराईले विद्यार्थीहरूलाई भविष्यमा कुनै पनि पेशा व्यवसायमा लाग्दा सीप र व्यवसायिक कुशलताका साथमा स्पष्टसँग बोल्न सक्नुपर्नेभएकाले निर्धक्क भएर आफ्ना कुरा राख्न हिच्किचाउन नहुने बताए ।

नेतृत्व गर्ने क्षमता भएका व्यक्ति अरु भन्दा अगाडि हुने भएकाले यो उमेरदेखि नै उत्सुकता, क्षमतावान, कुनै पनि कुरा सिक्न चासो राख्नुपर्ने उनले उल्लेख गरे ।

विद्यालय सञ्चालक समितिका अध्यक्ष नारायण पौडेलले विद्यार्थीमा नेतृत्व क्षमता विकासको महत्व दिलाउन यस्ता कार्यक्रम फलदायी हुने बताए । नेतृत्व विकास र नेतृत्वदायी भूमिका निभाउन विद्यार्थीले निरन्तर मेहनत गर्नुपर्ने उनले बताए ।

अध्यक्ष पौडेलले नेतृत्व लिने व्यक्तिमा अनुशासन पनि उत्तिकै जरुरी रहेको बताए । ‘अनुशासन नभए जस्तोसुकै क्षमता भएपनि काम लाग्दैन।’ अध्यक्ष पौडेलले भने ।

विद्यालयका प्राचार्य किरण सापकोटाले कक्षा प्रतिनिधिहरूको जिम्मेवारी र कर्तव्यका सन्दर्भमा सहजीकरण गरे ।

विद्यार्थीहरुमा अन्तर्निहित नेतृत्वको क्षमता विकास गर्ने अभिप्रायले यस कार्यक्रम आयोजना गरिएको प्राचार्य सापकोटाले जानकारी दिए ।

सापकोटाका अनुसार विद्यार्थीलाई कुनै पनि संस्था वा समूहको नेतृत्व कस्तो हुनुपर्छ र नेतृत्व कसरी गर्ने भनेर सिकाउनका लागि प्रशिक्षण दिइएको हो ।

‘यस्तो प्रशिक्षणले विद्यार्थीमा नविनतम सोच पलाउन सघाउँछ । विद्यार्थीले एकतहको नेतृत्व कक्षाकोठामै गरेका हुन्छन । त्यसलाई अझ व्यवहारिक बनाउन विद्यालयले प्रशिक्षण दिलाएको हो,’ उनले भने, ‘नेतृत्व भनेको असाधारण कुरा हो । सबैले सबै ठाउँ सही नेतृत्व लिन सक्दैनन, त्यसैले नेतृत्व लिन चाहनेमा केही खुबी हुनुपर्छ ।’

विद्यालयले विगत दश वर्षदेखि नियमित रुपमा यो खालको प्रशिक्षण दिँदै आएको सापकोटाले बताए ।

विद्यालयका संस्थापक राकेश जोशीले कार्यक्रमको सञ्चालन गरेका थिए । कार्यक्रममा विज्ञान, व्यवस्थापन तथा होटल व्यवस्थापन संकायका हरेक सेक्शनका छात्र र छात्रा प्रतिनिधिहरु सहभागी थिए ।