पोखरामा होली खेलेर पर्यटक रमाएका छन् । लेकसाइडमा विदेशी पर्यटकको बाक्लो उपस्थितिमा होली पर्व मनाइएको छ ।

लेकसाइड नै आन्तरिक तथा बाह्य पर्यटकका लागि होली मनाउने केन्द्र बन्दै आएको छ ।

फेवाताल किनार कोमागाने पार्कमा प्रचार नेपाल र स्पेक्स फोर्टिनको आयोजनामा भएको ‘होलिल्यान्ड’ मा हजारौंको उपस्थिति थियो । रेस्टुरेन्ट एन्ड बार एसोसियसन नेपाल (रेबान) पोखराले पनि लेकसाइड क्षेत्रमा होली उत्सव गरेको छ ।

१५ हजार सहभागी रहेको आयोजकको दाबी

‘होलिल्यान्ड’को दोस्रो संस्करणमा डिजे डेनी, डिजे अनिश, डिजे रुस, डिजे एम्मी, डिजे न्याक्सिजम, डिजे साउडेको प्रस्तुति रहेको थियो ।

कार्यक्रममा हट एअर बेलुन, अल्ट्रालाइट, ड्रोन स्प्ल्यास, खानाको स्टल र सांगीतिक प्रस्तुति आकर्षणको रुपमा रहेको थियो । होलीको मज्जा दिन पानीको ट्यांकरबाट रंग भरिएको पानीको फोहरा फालिएको थियो ।

करिब १५ हजार दर्शकले कार्यक्रममा भाग लिएको आयोजना संस्था प्रचार नेपालका संचालक आशिष पुरीले दाबी गरे ।

होलीमा गरिएको कार्यक्रममा दर्शकले दिएको साथले आफूहरुलाई आगामी कार्यक्रम गर्न निकै हौसला थपेको स्पेक्स फोर्टिनका संचालक महेश्वरसिंह भण्डारीले बताए ।

अन्तिम समयमा कार्यक्रम हुने स्थान बाराही घाटबाट कोमागाने पार्क सार्नु परेपनि दर्शकको साथले कार्यक्रम सोचेभन्दा धेरै सफल भएको उनको भनाइ थियो । करिब सात घण्टा चलेको कार्यक्रमको होस्ट यकिन गुरुङ थिए ।

२१ वर्षदेखि होली उत्सव

 रेबान पोखराले हरेक वर्ष होली उत्सव आयोजना गर्दै आएको छ । लेकसाइडमा लाइभ ब्यान्डको प्रस्तुतिमा पर्यटक रमाए ।

पर्यटकलाई नेपाली संस्कृतिसँग जोड्ने भन्दै २१ वर्षदेखि होली उत्सव आयोजना रेबानले गर्दै आएको छ । अब यो थाहा नहुनेका निम्ति पनि पोखराको होली नियमित तालिका बनिसकेको छ ।

महोत्सव पोखराको लेकसाइडको अम्बोटबाट हल्लनचोकसम्म पञ्चेबाजासहित पर्यटन व्यवसायी, आन्तरिक तथा बाह्य पर्यटक विभिन्न संघसंस्थाका प्रतिनिधिको उपस्थितिमा र्‍यालीसमेत निकालिएको थियो ।

नेपाल पत्रकार महासंघ कास्कीले पनि वर्षेनी महासंघ भवनमा होली खेल्दै आएको छ । कार्यक्रममा पत्रकार महासंघ गण्डकीका अध्यक्ष रमेश पौडेल, कास्कीका अध्यक्ष माधव बराल लगायत उपस्थित थिए ।

थप तस्वीरहरूः