काठमाडौं । नेकपा एमाले निकट विद्यार्थी संगठन अनेरास्ववियुको अध्यक्षमा डा. सुजन कडरिया निर्वाचित भएका छन् ।

गण्डकीका प्रकाश पौडेल ७ मतले पराजित भए । ७३२ मत सहित कडरिया विजयी हुँदा पौडेलले ७२५ मत पाए ।

अञ्जना सिवाकोटी र विकास श्रेष्ठ उपाध्यक्षमा निर्वाचित भएका छन् ।

महासचिवमा दीपक धामी र उपमहासचिवमा कमल जोशी विजयी भएका छन् । त्यस्तै, सचिवमा आकाश घर्ती, रचना सापकोटा, गोपाल नेपाल र ससीम बाबु खाम विजयी भए ।

१५५१ मतदातामा रहेको अखिलमा १४५७ मत खसेको थियो । विद्युतीय मेसिनमार्फत मतदान भएको थियो।

३२ वर्षे उमेरहद लागू गरिएसँगै महासचिव नरेश रोकाया, उपाध्यक्षहरू नारायण घर्ती, गोविन्द गिरी, मर्यादा विष्ट, धर्म गिरीलगायत अध्यक्षमा उठ्न पाएनन् ।

अध्यक्षमा सचिवद्वय कडरिया र पौडेलबीच कडा प्रतिस्पर्धा भयो । प्रकाशसँगै सचिवहरू दीपक धामी, अञ्जना शिवाकोटी र आरती भट्टराईसमेत अध्यक्षको आकांक्षी थिए । तर, प्रकाश बेगरको प्यानलमा अन्य सबै एक ठाउँमा उभिए ।

कडरियालाई पार्टीको आधिकारिक उम्मेदवार भन्दै प्रचार प्रसार भएको थियो । उसो त सर्वसहमत बनाउनुपर्ने भन्दै पार्टीले सुजनलाई अध्यक्ष, प्रकाशलाई उपाध्यक्ष नाम प्रस्ताव गरिएको थियो ।

कडरियाको प्यानल अध्यक्ष मण्डलकै तर्फबाट प्रस्ताव भएको थियो । अध्यक्षका आकांक्षीमध्ये अञ्जना शिवाकोटी उपाध्यक्ष र दीपक धामी महासचिवमा कडरियाकै प्यानलबाट चुनाव लडेका थिए । पौडेलले भने अध्यक्ष मण्डलको प्रस्तावप्रति असहमतहरूलाई समेटेर प्यानल बनाएका हुन् ।

गण्डकीबाट अध्यक्षमा प्रकाश र सचिवमा अनुप लामिछाने (४ मत) ले पराजयसँगै एक जना मात्र पदाधिकारी (आयोग अध्यक्ष) जित्न सक्यो । लेखा आयोग अध्यक्षमा अञ्जली लम्साल अम्बिकाले जीत हात पारेपछि गण्डकी शुन्य हुनबाट जाेगिएको हो । सचिवालय सदस्य, केन्द्रीय सदस्य तथा आयोग सदस्यमा केही पदमा मात्रै गण्डकीका उम्मेदवारले जितेका छन् ।

पदाधिकारी तथा सदस्यमा को निर्वाचित भए ? कति मत ल्याए ?