इन्जिनियरिङ अध्ययन संस्थान अन्तर्गतको पश्चिमाञ्चल इन्जिनियरिङ क्याम्पस पोखरामा नयाँ नियुक्त प्राध्यापकहरूको स्वागत तथा एसोसिएट प्रोफेसर डा. कृष्णराज अधिकारीको बिदाइ कार्यक्रम एक भव्य र भावनात्मक वातावरणमा सम्पन्न भएको छ ।

प्रगतिशील प्राध्यापक संगठन, पश्चिमाञ्चल क्याम्पसको आयोजनामा डिप गार्डेनमा सम्पन्न उक्त कार्यक्रममा क्याम्पस प्रमुख इन्जिनियर निर्मल बराल प्रमुख अतिथि रहेका थिए । आफ्नो सम्बोधनमा उनले डा. अधिकारीले बिताएको २८ वर्षे शैक्षिक यात्रालाई प्रेरणादायी भन्दै, क्याम्पसको शैक्षिक, अनुसन्धानात्मक र संस्थागत सुदृढीकरणमा पुर्‍याएको योगदानको उच्च प्रशंसा गरे ।

कार्यक्रममा प्रगतिशील प्राध्यापक संगठनका अध्यक्ष संजय बस्नेतले डा. अधिकारीलाई क्याम्पसका मार्गदर्शक, अभिभावक र प्रेरणाका स्रोतका रूपमा स्मरण गरे । उनले अधिकारीबाट धेरै प्राध्यापकहरूले अनुकरणीय प्रेरणा लिएको उल्लेख गर्दै भावी जीवन यात्राका लागि शुभकामना व्यक्त गरे ।

त्यस अवसरमा हालै नियुक्त प्राध्यापकहरूको सम्मानपूर्वक स्वागत गर्दै, उनीहरूको भूमिकालाई प्रभावकारी बनाउन वरिष्ठ प्राध्यापक तथा क्याम्पस नेतृत्वद्वारा आवश्यक सहकार्य र सहयोगको प्रतिबद्धता व्यक्त गरिएको थियो ।

कार्यक्रमको सञ्चालन श्री सम्राट पौडेलले आत्मीयता र मर्यादासाथ गरेका थिए । समारोहमा विभागीय प्रमुख, प्राध्यापकवृन्द तथा अन्य विशिष्ट अतिथिहरूको उल्लेखनीय उपस्थिति रहेको थियो ।

यस कार्यक्रमले अनुभवी शिक्षकमाथि श्रद्धा प्रकट गर्दै, नयाँ अनुहारहरूलाई स्वागत गर्ने क्याम्पसको स्वस्थ शैक्षिक संस्कृतिलाई थप समृद्ध बनाएको अनुभूति सबैमा गराएको थियो ।