सार्वजनिक भएको केही दिनमै लोकगीत ‘कलकत्ते काइयो’ ले उल्लेखनीय चर्चा बटुलेको छ । मोडल अनिल पौडेलले बजारमा ल्याएको यो गीतले अहिले टिकटक लगायतका सामाजिक सञ्जालमा राम्रै चर्चा पाइरहेको छ ।

लोकप्रिय गीत ‘माया आउने बस’ को सफलतापछि सोही टिमले तयार पारेको यो नयाँ सिर्जना दर्शक–श्रोतालाई पुनः लोभ्याइरहेको छ । सार्वजनिक भएको हप्ता दिनमै गीतले युट्युबमा दुई लाखभन्दा बढी भ्यूज पाइसकेको छ, जसले यसको लोकप्रियता स्पष्ट पार्छ ।

गीतमा नेत्र अर्यालको शब्द, दिप्लभ खातीको संगीत तथा देवी घर्ती र दिप्लभ खातीको आवाज सुन्न सकिन्छ । भिडियो पक्षमा विनोद भण्डारीको निर्देशन रहेको छ भने, गीतमा अनिल पौडेल र जुना विश्वकर्माको अभिनय प्रस्तुत गरिएको छ ।

मोडल पौडेल र गायक खाती दुवै जना बागलुङको निसीखोला गाउँका हुन् । अनिल पेशाले सिभिल इन्जिनियर पनि हुन् । उनले यसअघि पनि थुप्रै गीतमा अभिनय गरिसकेका छन् भने गायक खातीले पनि धेरै गीतमा आफ्नो स्वर दिइसकेका छन् ।

यो गीत ‘अनिल पौडेल’ युट्युब च्यानल मार्फत सार्वजनिक गरिएको हो । टिमले ‘माया आउने बस’ मा पाएको दर्शकको माया र समर्थनप्रति कृतज्ञता व्यक्त गर्दै, ‘कलकत्ते काइयो’ मार्फत पुनः सोही प्रेमलाई निरन्तरता दिन सफल मोडल पौडेलले बताए ।