स्याङ्जाको चापाकोट नगरपालिकामा मंसिर ५ गते बृहत् स्वास्थ्य शिविर सञ्चालन हुने भएको छ । सातौँ स्थापना दिवसको अवसरमा खुमा अर्याल फाउन्डेसन स्याङ्जाले चापाकोट –४ स्थित दार्सिङ स्वास्थ्य चौकीमा रक्तदान कार्यक्रमसहित स्वास्थ्य सेवा उपलब्ध गराउने भएको हो ।

चापाकोट नगरपालिकाको सहकार्य तथा नेपाल रेडक्रस सोसाइटी जिल्ला शाखा स्याङ्जा र गण्डकी मेडिकल कलेज पोखराको प्राविधिक सहयोगमा सञ्चालन हुने शिविरमा विभिन्न विशेषज्ञ चिकित्सकहरूको टोली खटिने फाउन्डेसनका अध्यक्ष लेखनाथ शर्माले जानकारी दिए ।

शिविरमा मुटु तथा मृगौला सम्बन्धी समस्यासहित विभिन्न रोगको जाँच र उपचार सेवा प्रदान गरिने छ । आवश्यक सबै प्रकारका औषधि पनि निःशुल्क वितरण गरिने फाउन्डेसनले जनाएको छ ।

शिविरमा जनरल फिजिसियनद्वारा सबै रोगको जाँच सुविधा उपलब्ध गराइनेछ । इको, इसिजी तथा अन्य आवश्यक ल्याब परीक्षणहरू समेत निःशुल्क हुने व्यवस्था गरिएको अध्यक्ष शर्माले बताए ।

जटिल केसहरूलाई आवश्यकताअनुसार गण्डकी मेडिकल कलेज पोखरा वा अन्य नजिकका स्वास्थ्य संस्थामा रिफर गरिने फाउन्डेसनले जनाएको छ ।

शिविरमा महिलाका लागि पाठेघरको क्यान्सर जाँचदेखि भिडियो एक्स–रे, मुटुको भिडियो एक्स–रे, इको, इसीजी तथा विविध प्रयोगशाला सेवा निःशुल्क उपलब्ध गराइनेछ । बिहान ९ बजेदेखि अपराह्न ४ बजेपछि सम्म शिविर सञ्चालन हुनेछ । स्वास्थ्य परीक्षणका लागि सबैलाई शिविरमा सहभागी हुन अध्यक्ष शर्माले आग्रह गरेका छन् ।

खुमा अर्याल फाउन्डेसन विगत सात वर्षदेखि सामाजिक तथा राहतमुखी कार्यक्रममार्फत सक्रिय रूपमा काम गर्दै आएको छ । फाउन्डेनसले हरेक वर्ष मंसिर ५ गते स्थापना दिवसको अवसरमा विभिन्न सामाजिक पहलमार्फत दिवस मनाउँदै आएको छ ।