चितवन । भ्रष्टाचारसँगै सरकार विरुद्ध उग्र रुपले अभियान चलाएका ज्ञानेन्द्र शाही कुटिएका छन् । ‘नेपालका लागि नेपाली’ अभियानका शाहीमाथि चितवनमा निर्घात कुटपिट भएको हो । उनलाई प्रहरीले तत्काल उद्धार गर्दा जोगिए ।

चितवनको चौबिसकोठीमा खबरदारी सभा राखेकोमा सत्तारुढ नेपाल कम्युनिस्ट पार्टी (नेकपा) सम्वद्ध विद्यार्थीहरुले अवरोध गरेका हुन् । चर्चित सञ्चारकर्मी रवि लामिछाने चितवनमा प्रहरी हिरासतमा हुँदा हप्ता दिनसम्म सो ठाउँ तनावग्रस्त बनेको थियो । त्यसैबेला ज्ञानेन्द्र शाही समेत पुगेर माहौल तताएका थिए । मन्त्री योगेश भट्टराई प्लेन चढ्न १५ मिनेट ढिलो भएको घटनामा सरकार विरुद्ध माहौल बनाउने कार्यमा ज्ञानेन्द्र शाही सफल भएका थिए । त्यस घटनापछि ‘नेकपाका अरिंगाल’ खनिन्छन् भन्दै सामाजिक सञ्जाल तातेको थियो ।

चितवनमा ‘राजावादीलाई कार्यक्रम गर्न दिँदैनौं’ भन्दै कार्यक्रममा अवरोध भए लगत्रै शाहीमाथि कुटपिट भएको हो । चौबिसकोटीस्थित होटल ग्लोबलबाट निस्किएर गाडी चढेका उनीमाथि कुटपिट भएको जनाइएको छ । उक्त समूहले शाही चढेको गाडीमा समेत तोडफोड गरेको छ । घटनामा संलग्न भएको आशंकामा प्रहरीले एक जनालाई पनि नियन्त्रणमा लिएको छ ।