काठमाडौं । भक्तपुरमा मंगलबार दुई जनामा कोरोना संक्रमण पुष्टि भएको छ । ललितपुरको आयोग्य फाउन्डेसनमा कार्यरत कोरोना संक्रमित युवती केही दिनअघि मात्रै सुनसरीबाट आएको पाइएको छ । उनी सुनसरीबाट भक्तपुर आइ ठिमीस्थित आफ्नो नर्स साथीको कोठामा केही दिन बसेकी थिइन् ।

संक्रमित युवती आरोग्य फाउन्डेसनमा एकाउन्टेन्टको रुपमा कार्यरत रहेको ललितपुर प्रहरीले पुष्टि गरेको छ । ‘आरोग्य प्रतिष्ठान स्वास्थ्यसम्बन्धी काम गर्ने संस्था भएपनि उहाँ त्यो अस्पतालमा एकाउन्टेन्ट रहेको खुलेको छ’, प्रहरी स्रोतले भने, ‘उहाँमा कोरोना पुष्टि भएसँगै आरोग्यसहित नजिकैको निदान अस्पतालसमेत सिल गरिएको छ ।’

ती महिलामा कोरोनाको संक्रमण पुष्टि भएपछि हाल टेकु अस्पतालमा भर्ना गरिएको छ ।

यसैगरी भक्तपुरमै मंगलबार कोरोना पुष्टि भएका अर्का एक जना पूर्वमन्त्री भीम रावलका सुरक्षामा खटिएका सशस्त्र प्रहरीका जवान हुन् । उनलाई पनि टेकुमा भर्ना गरिएको छ भने परिवारका अन्य सदस्यको पीसीआर टेस्टको तयारी गरिएको छ ।

नेपालमा फेरि मंगलबार साँझ २६ जना कोरोना संक्रमित थपिएका छन् । योसँगै संक्रमितको संख्या २१७ पुगेको स्वास्थ्य तथा जनसंख्या मन्त्रालयले जनाएको छ ।

(यसअघि, ती युवती नर्स भएको भनिएपनि त्यसलाई सच्याइएको छ । उनि आरोग्य फाउन्डेसनमा एकाउन्टेन्टको रुपमा कार्यरत थिइन् ।) -सं