पोखरा, २६ फागुन / प्रदेश नम्वर ४ मा आइतबार मन्त्रिपरिषदले पूर्णता पाउने सम्भावना बढ्दै गएको छ । मुख्यमन्त्री पृथ्वीसुब्बा गुरुङले फागुन ४ गते सपथग्रहण संगै पदभार ग्रहण गरेपनि मन्त्रिपरिषदले पूर्णता पाउन सकेको छैन । एमाले र माओवादी केन्द्रविच मन्त्रालयको विषयमा सहमती भएपनि एमालेले मन्त्री छनोट गर्न नसक्दा मन्त्रीपरिषद बिस्तार ढिलो भएको हो ।

मुख्यमन्त्री गुरुङले शुक्रबार विश्वासको मत लिएपछि मन्त्रीपरिषद विस्तार गर्ने तयारी गरेपनि अन्तिम समयमा आएर रोकिएको थियो । पार्टी भित्रको आन्तरीक विवादका कारण मन्त्री छनोट भएको कठिन भएको एमाले स्रोतले जनाएको छ । आइतबार ४ बजे मन्त्रीपरिषद विस्तार गरेर राष्ट्रपतिको निर्वाचनमा मतदान गर्न काठमाण्डौं जाने सोचमा मुख्यमन्त्री रहेको बुझिएको छ ।

मन्त्रीको नामावली आज रातीसम्म टुङ्ग्याएर मन्त्रीपरिषद विस्तार गर्ने सोंचमा मुख्यमन्त्री रहेको स्रोतले जनाएको छ । मन्त्रीका लागि एमालेको भागमा परेका पाँच मन्त्रालयमध्य एउटा मन्त्रालयमा मात्रै राम शरण बस्नेतमात्रै मन्त्री भएका छन । मन्त्रीका लागि बिकास लम्साल, चन्द्रमोहन गौचन, नरदेवी पुन, रोशन गाहा मगर, प्रभा कोइराला र कृष्ण थापाको नाम चर्चामा रहेको छ । मुख्यमन्त्रीले भेग, जातियता मिलाएर मन्त्री बनाउने सोंचमा बुझिएको छ ।

यता कास्कीबाट मन्त्री बनाउनका लागि दवाब बढे पनि कास्कीले समानुपातिक तर्फ धेरै सांसद पाएको र उपसभामुखपनि कास्कीले पाएका कारण बाँकी जिल्लाबाट मन्त्री बनाउन पर्छ भन्ने दवाबपनि उक्तिकै रहेको छ । मन्त्री छनोटमा सहमती सहमती जुट्न नसके मन्त्रीपरिषद बिस्तार पछि धकेलीने स्रोतले जनाएको छ । प्रदेश प्रमुखको कार्यालयलाई शुक्रबार नै मन्त्रीपरिषदको बिस्तारको बारेमा जानकारी गराइए पनि बिस्तार हुन सकेको थिएन ।

मुख्यमन्त्री पृथ्वीसुब्बा गुरुङलाई दुई तिहाई बहुमत

प्रदेश ४ का मुख्यमन्त्री पृथ्वीसुब्बा गुरुङले ससदबाट दुई तिहाईको बहुमत प्राप्त गरेका छन्। शुक्रबार बसेको प्रदेश सभा बैठकमा गुरुङले आफ्नो पक्षमा विश्वासको मत दिन आग्रह गरेपछि उनको पक्षमा ४१ मत परेको छ भने विपक्षमा १७ मत पर्यो।

एमाले र माओवादीको समर्थनबाट गएको फागुन ४ गते मुख्य मन्त्री बनेका गुरुङलाई संसद सभामा राष्ट्रिय जनमोर्चाले समेत समर्थन गरेको छ। जनमोर्चा यस अघि प्रतिपक्षमा थियो। सत्तारुढ दल एमालेको २७ माओवादीको १२ मत थियो भने जनमोर्चाको ३ मत पनि थपिएको छ। माओवादीबाट सभामुख बनेका नेत्रनाथ अधिकारीले शुक्रबार मत दिएनन्।

विपक्षमा कांग्रेसको १५ र नयाँशक्तिको २ गरि १७ मत परेको छ। प्रदेश ४ मा मनाङबाट स्वतन्त्र सांसद निर्वाचित भएका राजिव गुरुङ दिपक मानाङ्गे भने लगातार अनुपस्थित थिए ।