मष्तिस्कघातका कारण काठमाण्डौमा उपचाररत पोखरा महानगरपालिकाका मेयर मानबहादुर जिसीको अन्तिम शल्यक्रिया सफल भएको छ । मेयरका प्रेस संयोजक माधव बरालका अनुसार सोमबार मेयर जिसीको शल्यक्रिया सफल भएको हो ।

काठमाडौं बाँसबारीस्थित न्यूरो हस्पिटलमा कार्निओप्लाष्टी अपरेशन भएको हो । अपरेशनपछि मेयरलाई पोष्ट अपरेटिभ वार्डको आइसियुमा राखिएको बरालले बताए । शल्यक्रियामा संलग्न चिकित्कसले अपेरशन सफल भएको जानकारी दिएका छन् ।

गत १ साउनमा पोखरास्थित निवासमै मष्तिस्कघात भएपछि मेडिप्लस, मनिपाल हुँदै हेलिकोप्टमार्फत् काठमाण्डौ लगिएकोमा मेयर जिसी उतै बसी बाँसबारीमा उपचार गराउँदै आएका छन् । पछिल्लो समय छोरीकै हेरचाहमा उनकै घरमा बसी स्वास्थ्यलाभ गरिरहेका छन् । मेयर जिसीको गत हप्ता अपरेशन गर्ने तयारी गरिएको भएपनि पिसाबमा इन्फेक्शन देखिएपछि एक हप्ता सारिएको हो ।

मष्तिस्कघात भएपछि पहिलो अपरेशन गर्दा टाउकोको माथिल्लो हड्डी बाहिर निकालिएकोमा अहिले पुनः त्यही हड्डी टाउकोमै प्रत्यारोपण गरिएको हो । प्रेस संयोजक बरालले टाउकाकोे टाँका खोलेपछि मेयर जिसी पोखरा आउने जानकारी दिए ।

मष्तिस्कघातपछि एक हरमा समस्या देखिएकाले फिजियोथेरापी जारी राख्नु पर्ने भएपनि अन्य उपचार अब पूरा भएको छ । एमाले नेता एवं कास्कीका सांसद खगराज अधिकारीले मेयर जिसीलाई भेटेपछि फेसबुक वालमा तस्विर पोष्ट गर्दै अब मेयर जिसी छिट्टै पोखरा फर्कने बताएका छन् ।