काठमाडौं । सरकारले राजनीतिक दलसम्बन्धी अध्यादेश फिर्ता लिने निर्णय गरेको छ । आज बसेको मन्त्रिपरिषद् बैठकले फिर्ता लिनका ल लागि राष्ट्रपति विद्यादेवि भण्डारी समक्ष सिफारिस गरेकोमा राष्ट्रपति भण्डारीले राजनीतिक दलसम्बन्धी अध्यादेश खारेज गरेकी छन् ।

प्रधानमन्त्री शेरबहादुर देउवाको सिफारिसमा सोमबार राष्ट्रपति भण्डारीले राजनीतिक अध्यादेश खारेज गरेकी हुन् । राष्ट्रपति कार्यालयले एक विज्ञप्ति जारी गर्दै संविधानको धारा ११४ को उपधारा २ को खण्ड ‘ख’बमोजिम अध्यादेश खारेज गरिएको जानकारी दिएको छ ।

विज्ञप्तिमा भनिएको छः ‘सम्माननीय राष्ट्रपति विद्यादेवी भण्डारीज्यूले नेपाल सरकार, मन्त्रिपरिषद्को असोज ११ को निर्णय एवम् सम्माननीय प्रधानमन्त्रीज्यूको सिफारिसमा नेपालको संविधानको धारा ११४ को उपधारा २ को खण्ड ख बमोजिम राजनीतिक दलसम्बन्धी (दोस्रो संशोधन) अध्यादेश, २०७८ खारेज गर्नुभएको छ’

केन्द्रीय समिति वा संसदीय दलमा २० प्रतिशतमा पुगे दल विभाजन हुनसक्ने प्रावधान सहित सरकारले अध्यादेश जारी गरेको थियो । अध्यादेश जारी भइसकेपछि नेकपा एमाले र जनता समाजवादी दल विभाजन भइसकेको छ ।

जनता समाजवादी पार्टीले अध्यादेश फिर्ता नलिइ सरकारमा सहभागी नहुने अडान राखेपछि सरकारले अध्यादेश फिर्ता लिने निर्णय गरेको हो।अध्यादेश जारी राख्दा दलहरु विभाजन हुने खतरा महसुस गरेर अध्यादेश फिर्ता लिने निर्णय सरकारले गरेको हो ।