गण्डक न्युज पोखरा/ चुनावमा बालबालिका प्रयोग गर्न निर्वाचन आचारसंहिताले रोकेको छ । तर नरेशशंकर पालिखे भने ‘बालक’ नै लिएर चुनावी अभियान सुरु गरेका छन् । उम्मेदवार बन्दा आफ्नो पार्टी नेपाली कांग्रेसबाट निश्काषित पालिखे चुनावी अभियानमा बालक लिएर हिँड्दा कारबाहीमा भने पर्नेछैनन् । किनकि उनीसँग रहेको ‘बालक’ अभियानका सहयोगी होईनन्, यो उनको चुनाव चिन्ह हो ।
कास्की क्षेत्र नम्बर २ (ख) प्रदेश सभा सदस्य उम्मेदवार पालिखे ‘आस्था र निष्ठाको राजनीति जोगाऔं’ नाराका साथ चुनावी अभियानमा जुटेका छन् । अहिले पालिखे शान्त रुपमा अभियानमा ब्यस्त छन् ।
नेपाली काँग्रेसबाट टिकट नपाएपछि पालिखेले बागी उम्मेदवारी दिएका थिए । पार्टीले बिन्दुकुमार थापालाई टिकट दिएको छ । पार्टीका नेताहरुले अनेकौं प्रयास गर्दा समेत उनले उम्मेदवार फिर्ता पनि लिएनन् ।
यसअघि पोखरा लेखनाथ महानगरपालिकाको मेयरको टिकट पाउने भनिएपनि रातारात टिकट खोसिएपछि उनी प्रदेश सभाको टिकट पाउनेमा ढुक्क थिए । यसपटक पनि टिकट नपाएपछि पालिखेले उम्मेदवारी दिएका हुन् । त्यसपछि ठ्याक्कै एक हप्तामा पार्टीले साधारण सदस्य समेत नरहने गरी निश्कासन गरिसकेको छ ।
पार्टी अनुशासन विपरित आधिकारिक उम्मेदवारलाई नै असहयोग गर्ने गरी वागी उम्मेदवारी दिएपछि उनलाई साधारण सदस्य समेत नरहने गरी कारबाही गरिएको हो । पार्टी गम्भिर संकटमा रहेको बेलामा अनुशासनभन्दा बाहिर रहेर पार्टी विरुद्ध नै बागी उम्मेदवारी दिने पालिखेलाई सहयोग नगर्न उसले आफ्ना सम्पूर्ण भातृ संघसंस्थाहरुलाई निर्देशन समेत दिएको छ ।
आफु पार्टीप्रति आस्थावान कार्यकर्ता हुँदाहुँदै पार्टीले मुल्यांकन नगरेको आरोप उनको थियो । ‘आस्था र विश्वास सहित निष्ठाको राजनीतिक गर्ने मान्छे कहिलैपनि बिचलित हुँदैन । चुनाव जित्ने योजनाका साथ भोट माग्न थालिसकेको छु । चुनाव जितेर आफ्नो क्षेत्रलाई नेपालकै उत्कृष्ट बनाउनेछु ।’ उनले उम्मेदवारी फिर्ता नलिने सन्दर्भमा भनेका थिए ।
पालिखे सबैभन्दा सानो उमेरमा (२८ बर्ष) पोखराका उपमेयर भएका ब्यक्ति हुन् भने सानै उमेरमा काँग्रेसले मेयरको टिकट समेत दिएको थियो । पोखरा नगरका नगरसभापतिमा सचिव हुँदै २ पटकसम्म सभापति र पोखरा उपत्यका नगरविकास समितिका अध्यक्ष समेत भैसकेका छन् ।
४१ सालमा पृथ्वीनारायण क्याम्पसको स्ववियुमा चुनाव लडेर पराजीत भएका उनी काँग्रेस कास्कीको जिल्ला कोषाध्यक्ष र सचिव समेत भैसकेका थिए । त्यसपछि लगातार २ पटक महासमिति सदस्य भएका पालिखे हाल पार्टीको महाधिबेशन प्रतिनिधी छन् । उनी २०४६ सालमा एमविए तर्फ नेपाल टप भएर गोल्ड मेडल समेत जितेका थिए ।
सम्बन्धित खबर
पोखरा ६ मा प्रथम वडा स्तरीय बुद्धिचाल प्रतियोगिता
रामघाटबाट ड्रग्ससहित तीन युवक पक्राउ
चौथो संस्करणको अन्नपूर्ण म्याराथन जेठ २१ मा हुँदै
पोखरा विश्वविद्यालय शिक्षण अस्पताल उद्घाटन
चिल्ड्रेन नेपालद्वारा सहारा आ.वि. मा सहयोग
पोखरामा जुवातास खेल्ने ६ जना पक्राउ
यो पनि पढौँ
स्याङ्जामा विवाहकै दिन बेहुलाबेहुली पक्राउ
जनकपुरको होटलमा बेहोस भेटिएकी पोखराकी युवतीको मृत्यु, सँगै बसेका २ युवक फरार
आँखामा राख्दा पनि नबिझाउने ‘बिनोद सर’ अब सम्झनामा
बालकुमारीमा मारिएकाका परिवारलाई कोरियाबाट आर्थिक सहयोग